2002an hasi ziren zerrenda hori egiten eta, jakina, 2019an ere egin da. Baina aurten bada berezitasun bat, Bill Gatesek egin duelako.

Zehaztasun handiko esku robotikoak

Robotek paper garrantzitsua hartu dute lantegietan, batik bat muntaia katean objektuak manipulatzeko orduan. Lan hori egin dezakete eraginkorki eta modu errepikakorrean, nekatu edo aspertu gabe.

Energia nuklear berria

Fusio eta fisio nuklearra egiteko modu berriak iritsi dira mundura. IV. belaunaldiko erreaktoreak dira, diseinu txikiagoa, merkeagoa eta seguruagoa dutenak. Erreaktore txiki horiek dozenaka megawatio energia sor dezakete. Aldiz, gaur egungo erreaktore arruntek 1.000 MW sor ditzakete eta horrek segurtasun arriskuak dakartza.

Haur bat goiztiarra izango den aurreikustea

Medikuntzaren arazo garrantzitsuenetako bat da hamar haurretik bat garaia iritsi baino lehen jaiotzen dela. Baina odol proba berritzaile bati esker, medikuek garaiz izango lukete horren berri.

Hesteetako zunda

Zientzia fikzioa egia bihurtzen denean bezala, osasunaren esparruko garapen honek ere harridura sortzen du. Bill Gatesek dio badela proiektu bat gaixo dagoen paziente baten hesteak barrutik ikusten lagunduko duena. Zehazki, baliagarri izango da giroko enteropatia (garapen bidean dauden herrialdeetan oso ohikoa den hesteetako hantura bat) duten gaixoak aztertzeko.

Minbiziaren aurkako txertoak

Bill Gatesek aipatu du balitekeela minbiziaren kontrako txertoak existitzea. Horrelako txerto batekin gorputzak minbizi-zelulak identifikatuko lituzke, eta mota desberdinetako tumoreen zelulak bakarrik eraso eta suntsituko lirateke.

Okelarik gabeko hanburgesak

Arraroa dirudien arren, posible da okelarik gabeko hanburgesak ekoiztea, animalien ehun bat bio-erreaktoreetan haziaraziz. Hori bai, oraindik okelaren zaporea lantzen ari dira, kontsumitzeko modukoa izan dadin. Aurreikuspenek diote metodo horrekin eginiko lehen hanburgesa prest egon litekeela 2020rako.

Karbono dioxidoko kaptadore bat

David Keith izeneko Harvardeko zientzialari batek kalkulatu zuen tona bat CO2 erretiratzeak 100 USDeko kostua izan dezakeela. Ez da merkea, baina ezta ere duela zenbait urte kalkulatu zen bezain garestia.

Elektrokardiograma eskumuturrean

Bill Gatesek azpimarratu zuen zein baliagarri diren elektrokardiograma bat egiteko gai diren ordulari adimendunak. Horri esker, jendeak zehatz-mehatz eta segurtasun handiagoz monitorizatu ahal izango du bere osasuna.

Estolda premiarik gabe

Duela urte batzuk Bill Gatesek Interneten existitu den erronka interesgarrienetako bat asmatu zuen. Reinvent the Toilet Challenge du izena eta lehiaketan parte hartu zuten taldeek komun berritzaileak egiteko ideiak aurkeztu behar izan zituzten. Arrazoia sinplea da: estoldarik edo gorotzak kudeatzeko modu eraginkorrik ez duten milaka pertsonaren bizi-baldintzak hobetzea.

fayerwayer.com