Londres mendebaldeko Imperial College London campus berrian algaz estalitako eguzki-xafla biologiko berde distiratsuak jarriko dituzte laster hainbat eraikinetako teilatuetan. Landareek karbono dioxidoa hartzen dute airetik eta oxigeno freskoa ekoizten dute, lur-azalera berdin bateko zuhaitzek baino 100 aldiz azkarrago. Gainera, mikroorganismo mikroskopiko horiek bildu egin daitezke elikagaietan erabiltzeko.

"Eguzki-xafla biologikoa deitzen diogu” dio Julian Melchiorri-k, teknologia berri hori diseinatu duen Arborea konpainiako zuzendari nagusiak. “Eguzki energia erabiltzen du, baina energia hori argindar bihurtu beharrean (eguzki-xafla arrunt batek egingo lukeen bezala), elikagai bihurtzen dugu”.

Melchiorri-k dio mikroalgak dagoeneko erabiltzen direla elikagaietan, baina xafla berriek produkzio-prozesu patentatu bat darabilte, zeinari esker hazkuntza merkeagoa eta eskalagarriagoa baita eta produktua, berriz, kalitate handiagokoa.

“Gure campus berria bertan behera utzitako eremu industrialez inguratuta dago eta horrek esan nahi du ez dela erraza zuhaitzak landatu eta eremuak berdetzea” dio Neil Alford-ek, Londreseko Imperial College campuseko zuzendari laguntzaileak. “Baina teknologia hori erabil dezakegu zuhaitzak ordezkatzeko. Londres barruan oxigenoa sortu ahal izango dugu –eta hori ez da ideia txarra-, baina, horrez gain, sortu dezakegu zerbait gai dena area bateko azaleran zuhaitzek baino 100 aldiz oxigeno gehiago ekoizteko. Algek naturalki xurgatzen dute CO2 eta beste organismo fotosintetiko batzuk baino azkarrago askatzen dute oxigenoa. Eta xafletako hazkuntza-sistemari esker, edozein tokitan egin daiteke prozesu hori. “Xaflak berdin ezar daitezke eraikinen hormetan edo teilatuetan, eta hori interesatzen zaigu”.

clubdelfuturo.com