Torontoko Unibertsitateko Dalla Lana Osasun Publikoko Eskolako ikertzaile talde batek onlineko aplikazio interaktibo bat garatu du, ospitaleek eta arreta medikoa ematen duten beste zentro batzuek hobeto kalkulatu dezaten COVID-19aren kasu berriak kudeatzeko duten gaitasuna.

Onlineko tresna berriak hainbat datu hartzen ditu kontuan (zein den arreta medikoa ematen duen zentro espezifiko batek izan ditzakeen arreta akutu eta kritikoko baliabide kopurua, COVID-19aren kasuei buruzko datuak adinaren eta larritasunaren arabera, eta pazienteek egingo dituzten egonaldien iraupenen aurreikuspenak), eta horrela ospitaleek hobeto jakin dezakete nolako gaitasuna duten pandemiari arin eta zorrotz erantzuteko.

Baliabideen eskuragarritasuna aztertzen duen tresna horrek (Stall enpresarekin batera garatua), aukera ematen die erabiltzaileei hainbat aldagai sartzeko: zainketa intentsiboko unitateetako ohe kopurua, zainketa kritikoko unitateetako ohe kopurua, COVID-19a duten pazienteentzako haizagailu mekanikoen kopurua eta halakoak beharko dituzten COVID-19 gaixoen portzentaje aurreikusia.

Adinaren eta larritasunaren arabera sailkatutako datuak kopuru horiei aplikatzean, tresnak grafiko bat sortzen du eta bertan azaltzen du zenbat COVID-19 kasu berri kudeatu ditzakeen egunero ospitale batek edo arreta medikoko agintaritza batek, baliabideen defizitik jasan gabe.

Horrela beraz, tresna hau oso baliagarria izan liteke osasun arretako sistementzat, balitekeelako pandemiari aurre egiteko baliabide berriak erosten aritzea edo horretarako asmoa izatea, eta, lehenik eta behin, jakin behar dutelako nola optimizatu eskura dauzkaten baliabideak.

tendencias21.net