Laborategian okela ekoitzi ahal izateko, animalien giharretako ehunak erauzi behar dira eta bio-erreaktoreetan hazi. Amaierako produktua animalia batetik ateratako okelaren oso antzekoa da, baina zaporea ez dago hain lortua.

Laborategian sortutako okela eskalan ekoitzi nahi duen Maastrichteko Unibertsitateko (Herbehereak) talde batek uste du laborategian ekoitzitako okelaz eta behikiz eginiko hanburgesen kostuak antzekoak izango direla datorren urtean.

Laborategian ekoitzitako okelaren desabantailetako bat da oraindik abantaila gutxi dakarzkiola ingurumenari. Munduko Ekonomia Foroak berriki eginiko txosten batek dio laborategian ekoitzitako okelak eragiten dituen isuriak %7 txikiagoak direla behikia ekoizteak eragiten dituenak baino.

Beyond Meat eta Impossible Foods (Bill Gates da bi konpainietako inbertitzaileetako bat) bezalako konpainiek landareetan oinarriturik egiten duten okela artifizialak propietate hobeak ditu ingurumenari dagokionez. Haragi honek ilar, soja, gari, patata eta landare-olioetatik ateratako proteinak erabiltzen ditu animaliaren okelak duen testura eta zaporea imitatzeko. Beyond Meat enpresak 2.400 metro koadroko fabrika berri bat dauka Kalifornian (AEBak) eta 25 milioitik gora hanburgesa saldu ditu dagoeneko 30.000 denda eta jatetxetan.

technologyreview.es