Badakigu teknologia horiek berekin ekar dezaketela langabezia-tasa handiagoa, alienazio soziala, desberdintasun handiagoak eta kalteak planetarentzat. Baina denek ez dute berdin pentsatzen.

Silvia Lealek (doktorea soziologian eta aditua eraldaketa digitalean) uste du beste gauza bat aipatu behar genukeela: "pertsonen bizi-itxaropenean eta bizi-kalitatean izango duen eragin positiboa, alegia. Leal No te vas a morir (Círculo Rojo Editorial) liburuaren egilea da, non aurrerapen horien ibilbidea aipatzen baitu: nondik datozen, zein egoeratan dauden eta norantz jo behar luketen. "Batik bat, zenbait pertsonaren eguneroko bizitza hobetuko dute, alegia, beren bizia arriskuan jar dezaketen edo desberdintasun egoerak sor ditzaketen nahasteak, gaixotasunak edo desgaitasunak dituztenena".

Liburuak ikuspegi positiboa du etorkizunaz, ez ordea inuzentea, eta bi tesi hartzen ditu oinarritzat: lehenago ere gertatu da hau, eta munduak asmatu du hobera aldatzen. "Kontuan hartzen badugu haurren hilkortasuna edo lanaldien iraupena eta aztertzen badugu azken mendean izan duten bilakaera, ikusiko dugu izugarrizko aldaketa dagoela, hainbestekoa ezen pentsa baitezakegu mirari bat dela. Gaur egun ezinezkoa iruditzen zaigu organo bat inprimatzea. Edo gure lanaldia eguneko lau ordutara murriztea. Baina Jack Ma (Alibaba merkataritza elektronikoaren sektoreko enpresa txinatar erraldoiaren fundatzailea) eta bera bezalako beste batzuk seguru daude datozen urteetan gertatuko dela egokitzapen hori" adierazi du Lealek. Horrez gain, bizi-kalitatearen hobekuntza irudikatzeko, osasun arloko aurrerapenen errepertorio zabala eskaintzen du: "Enpresak ez dira bakarrik ikertzen ari nola bihur gaitezkeen hilezkor. Inbertsio gehienak, komunikabideetan agertzen ez diren arren, nire ustez garrantzitsuagoak diren arazoak konpontzera bideratzen dira: Alzheimerra, diabetesa, mugitzeko desgaitasunak, Parkinsona Gainera, konpainientzat errentagarriagoa da hori, gure bizitza luzatzea baino. Asko dira horrelako arazoak dituzten pertsonak, eta komenigarria litzateke haientzako konponbide bat aurkitzea".

elpais.com