Euskal Herriko Unibertsitateko (UPV/EHU) iturriek diotenez, kostu baxu hori lortu dute “ikerketan parte hartu duten pertsona eta erakundeen ekarpen altruistari esker”. Horrez gain, gure erkidegoko beste ikerketa zentro batzuetako laborategietan egin ahal izango da, eta baita ospitaleetan ere, baldin eta Osakidetzak gaur egun erabiltzen dituen RT-PCR kit komertzialek stock haustura bat jasaten badute.

Ikerbasque-ko (UPV/EHU) ikertzaile eta ekimen honen koordinatzaile den Ugo Mayorren iritziz, “test alternatibo hau auzolanean garatu izanak balioan jartzen du ikerketaren eta zientziaren garrantzia, bai eta, erakundeen babesa izanez gero, gizartearen ongizatean izan dezaketen benetako inpaktua”.

PCRa material genetiko kopuru oso murritzak (kasu honetan birusarenak) handitzeko teknika bat da. RT-PCR aldaerarekin posible da material genetiko horren detekzio kuantitatibo bat egitea eta, ondorioz, infektatuta daudenak eta birusik ez dutenak bereiztea. Test berria martxan jartzeko lanak konfinamenduko lehen astean hasi ziren eta “abiada bizian garatu dira”, unibertsitateko iturrien arabera.

Argitaratutako azken artikuluak irakurri eta hainbat eztabaida telematiko izan ostean, 55 ikertzaileko lantalde batek ekintza-plan bat diseinatu zuen UPV/EHUren laguntza instituzionalarekin. Bigarren asterako -denbora errekorrean-, euste eta segurtasun biologikoko sei laborategi atondu zituzten UPV/EHUk Leioan daukan María Goyri Bioteknologia Zentroan, eta beharrezko eskakizun legal guztiak tramitatu zituzten.

irekia.euskadi.eus