Horren harira aurkeztu zuten La Caixa Gizarte Ekintzak eta Forum Ambiental Fundazioak Ekoberrikuntza eta bere potentziala Espainian 2017rako txostena.

Agiriak bere baitan biltzen ditu bere ustez aurten funtsezkoak izango diren lau kontzeptuak: birmanufaktura, ekonomia zirkularrean oinarritua, eta aukera ematen duena materiala berriro aprobetxatzeko eta berotegi efektuko gasen isuria nabarmen murrizteko; hornidura-kateen trakzioa, hau da, hornitzaileekin gardentasun handiagoa lortzea; serbitizazioa, alegia, bezeroen beharretara hobeto egokitzen diren produktuak eskaintzea; eta, azkenik, big data kudeatzea, hau da, operazioak hobetzea datuen balioa kontuan hartuta.

Hain zuzen ere, birmanufakturaren bitartez materialaren % 80 aurrezten da, eta irabazi handiagoak sortzeaz gain, posible egiten du ingurumena hobetzea, isuri gutxiago sortzen delako, lehengai gutxiago kontsumitzen eta erauzten delako eta hondakinen sorrera murrizten delako. Txostenak Remanufacturing Market Study azterlanera igortzen gaitu, zeinaren arabera birmanufakturak 30 mila milioi euro inguru sortu baititu 2015ean eta 4.800 milioi euro sor baititzake Espainian, batez ere sektore aeroespazialean eta automobilgintzan. Gainera, txostenak dioenez, Europan 8 milioi tona CO2 gutxiago sortu da.
Bestalde, hornidura-kateetan trakzio-lana egiteak eragina izan dezake Espainiako ekoizpen sektoreengan. Badirudi elikadurarekin loturiko sektoreak izango direla eragin handiena jasango dutenak, uste baita sektore horietako hornidura-kateetan egingo dela presiorik handiena.

Hirugarrenik, serbitizazioa dela medio, serbitizatutako enpresen hazkunde-potentziala urteko % 5 eta % 10 bitartekoa izango da batez beste, Astongo Negozio Eskolako ikerketen arabera. Era berean, enpresa horietako bezeroek % 25 edo % 30 inguru gutxitu dituzte beren kostuak. Espainiaren serbitizazio maila AEB, Erresuma Batua edo Alemaniaren antzekoa balitz (zerbitzuak eskaintzen dituzten manufaktura enpresen indizea % 25 eta % 30 bitartean egonik), serbitizazioa zabaltzeak urteko 4.500 eta 11.300 milioi euro bitartean emendatuko luke manufaktura sektorearen zifra.

Big data sektorean hamar aldiz handitu zen profesionalen eskaria 2010 eta 2015 bitartean. Kontuan izanik analitikan aplikatzeko duen potentziala, Big & open data in Europe txostenak kalkulatu du BPG % 1,7 haz daitekeela 2020rako, eta horrek 14.000 milioi eurotik gorako diru-sarrera ekarriko lioke Espainiako ekonomiari.

laboratorioecoinnovacion.com