Thuwal-eko Abdala Erregea Zientzia eta Teknologia Unibertsitateko (Saudi Arabia) ikerlariek dispositibo bakar batean uztartu dituzte ura arazteko eta argindarra ekoizteko sistemak eguzki-xaflak erabiliz. Berrikuntza honen xehetasunak Nature Communications aldizkariaren azken alean argitaratu dira.

Ur garbiaren eta energiaren eskaera gero eta handiagoa da mundu osoan, eta horixe da garapen sostengarriak duen erronka handienetako bat. Izan ere, ur asko behar da argindarra ekoizteko. Saudi Arabia bezalako eremu idorretan hain ur eskasia handia dago, ezen ekoizten den argindarraren %15 baino gehiago erabiltzen baita ur geza ateratzeko ur gazitik, lurpeko ur kutsatuetatik edo industriaren hondar-uretatik.

Arazo horiei aurre egite aldera, Peng Wang-ek zuzendutako zientzialari-taldeak existitzen diren bi teknologia konbinatu ditu: eguzki-xafletako teknologia fotovoltaikoa (argindarra sortzeko) eta mintzen destilazioa (urak arazteko prozesu bat, eguzki energiarekin funtzionatu dezakeena).

“Xafla fotovoltaikoek bero handia sortzen dute argindarra ekoizten ari diren bitartean” azaldu dio Wang-ek Sinc-i. Normalean bero hori giroan galtzen da, baina posible da energia-iturri bezala erabiltzea.

agenciasinc.es