Euskadiko -eta beste gune geografiko batzuetako- enpresa sarearen ezaugarri garrantzitsuenetako bat da ez dagoela prest bere esperientzia eta ezagutzak partekatzeko beste negozio batzuekin, nahiz eta horrek hobekuntzak suposatu beretzat. Baina, berrikuntzaren arloan hasi dira muga horiek gainditzen,Orkestra Euskadiko Lehiakortasun Institutuak eginiko azterlan baten arabera.

Agustín Zubillaga koordinatzaileak dio gero eta konexio gehiago daudela euskal enpresa trakziogileen eta startupen artean, “nahiz eta oraindik bide luzea dagoen egiteko”. Bere ustez errezeloak desagertzen hasi dira, baina “beste edozein kultur eremutan bezala, denbora beharko da”.

Momentuz badaude lankidetzan diharduten hainbat adibide, eta ikusirik enpresen garrantzia eta tamaina, baliteke produkzio-sareko gainerako kideak ere bide horretara erakartzea. CAF, Irizar edo DanobatGroup bezalako enpresek apustu egin dute startup batekin harreman egonkorrak sortzeko, eta horrela, digitalizazio prozesuan aurrera egiteko.

“Batzuek I+G arloko startup bat azpikontratatzen dute, baina ohartu gara joera dela horrelako harremanak indartzea, hots, inbertsioak egitea” azaldu du Zubillagak. Inbertsio hori izan liteke fiskala, hau da, ongi errotutako enpresak kopuru ekonomiko bat esleitzen dio startupari erantzun bat garatu dezan premia zehatz batentzat, baina bere negozioan sartu gabe; edo izan liteke industriala ere.

noticiasdegipuzkoa.eus