Lurretik 1.000 metrora. Etorkizuneko hirietako pertsonek altuera horretan egingo dute lan, eta altuera horretan harremanduko dira. Hiriek etxe-orratz askoz garaiagoak izango dituzte eta moldakorragoak izango dira, teknologia berriei esker elkarri konektatuta egongo direlako, euren energia sortuko dutelako eta joan-etorrien arazoak saihestuko dituztelako. Funtsean, horrelako etxe-orratzek hiri bertikalak sortuko dituzte: tamaina erraldoiko konplexu urbanoak, non gauza gehienak behetik gora gertatuko baitira.

Badirudi horixe dela planteamendu urbanistiko onena etengabe hazten ari den eta gero eta handiagoak diren hiri gutxi batzuetara migratzen duten biztanleentzat. Gauzak horrela, ezinbestekoa da hiriaren kontzeptua birformulatzea, espazioa hobeto aprobetxatuko duten metropoli eraginkorragoak lortzeko. “Uste da 2050ean 15.000 milioi biztanle inguru izango garela munduan. Horrek eragina izango du arkitekturan, gaur egun daukaguna baino lau aldiz gehiago eraiki beharko delako” dio Javier Pioz arkitekturako doktore eta Javier Pioz Arquitectos estudioaren fundatzaileak.

Bere iritziz, [familia bakarreko etxebizitzetan eta dentsitate baxuko urbanizazioetan oinarritutako] hazkunde horizontala azkenetan dago. Ez dago prest biztanleriaren hazkunde masiboari aurre egiteko, eredu garestia da oso, eta energia asko kontsumitzen du”. Hiri bertikalen filosofiak hiri egitura berriak planteatzen ditu, funtzio anitzak izango dituzten eraikinekin. Hiri bertikal horiek hainbat zerbitzu ostatatuko dituzte, besteak beste, etxebizitzak, bulegoak, anbulatorioak, merkataritza-zentroak, lorategiak eta garraio ekologikoak, eta baita ere bertikalean eta horizontalean mugituko diren igogailuak. Baliteke zerbitzu horietako batzuk airean zintzilik egotea.

technologyreview.es