Berrikuntzako Adierazleen Europako Koadroak analisi konparatibo bat egiten du EBko herrialdeetako eta Europako beste herrialde batzuetako berrikuntzaren errendimenduarekin. Analisi horrek lagundu egiten die herrialdeei euren berrikuntzako sistema nazionalen indarguneak eta ahuluneak ebaluatzen eta jorratu beharreko erronkak identifikatzen.

Azterlan honek lau multzotan banatzen ditu EBko herrialdeak: berrikuntzako liderrak, berritzaile indartsuak, berritzaile moderatuak eta berritzaile hasiberriak.

• EBn Suedia da, beste behin, berrikuntzako jardun onena duen herrialdea. Finlandia, Danimarka, Herbehereak eta Belgika ere liderrak dira berrikuntzan.
• Irlanda, Luxenburgo, Austria, Alemania, Txipre eta Frantzia berritzaile indartsuak dira, eta euren errendimendua EBko batez bestearen gainetik dago.
• Estonia, Eslovenia, Txekia, Italia, Espainia, Portugal, Malta, Lituania eta Grezia, aldiz, berritzaile moderatuak dira.
• Eta azkenik, Hungaria, Kroazia, Eslovakia, Polonia, Letonia, Bulgaria eta Errumania berritzaile gorakorrak dira.

EBko ia herrialde guztiek hobetu dute euren berrikuntzako jarduna 2015-2022 artean. EBko 2015eko datuekin alderatuta, Txipre, Estonia, Grezia, Lituania eta Txekia izan dira euren errendimendua gehien handitu dutenak. Kroazia eta Polonia berritzaile gorakorren kasuan, euren berrikuntza jarduna EBko batez bestekoa baino azkarrago hazi da.

Halere, berrikuntzako etena presente dago oraindik EBn. Berrikuntzan diharduten taldeak geografikoki kontzentratuta egon ohi dira: liderrak eta berritzaile indartsuak Europa iparralde eta mendebaldean kokatzen dira nagusiki, eta berritzaile moderatu zein gorakor gehienak, aldiz, Europa hegoalde eta ekialdean.

2015 eta 2022 artean EBren posizio erlatiboa hobetu egin da mundu mailako lehiakide guztiekiko, Txinarekiko izan ezik. Ondorioz, EBk zertxobait murriztu du Australia, Kanada, Hego Korea eta Estatu Batuekiko zuen etena. Aukeratutako lehiakide globalen artean, Hego Koreak berritzaileena izaten jarraitzen du.

Berrikuntzako Adierazleen Europako aurtengo Koadroa 2021eko edizioko adierazleen marko berean oinarritzen da. Marko horrek 32 adierazle ditu 12 dimentsiotan sailkatuta, besteak beste, ikerketa-sistema erakargarriak, ikerketa eta garapeneko inbertsio irmoa eta informazio teknologien erabilpena.

research-and-innovation.ec.europa.eu