Bi dira EAEn bereziki nabarmentzen diren alderdiak: konektagarritasuna -hots, banda zabal finko eta mugikorraren ezarpena eta estaldura eta prezioaren indizea- eta zerbitzu publiko digitalak.Baina atzean geratu da herritarrek interneteko zerbitzuei ematen dieten erabileran.

Azterlan honi esker posible da EAEko digitalizazio-maila neurtzea EBko Estatu kideekin alderatuta.Horretarako, bost dimentsio aztertu dira: konektagarritasuna, giza kapitala, interneteko zerbitzuen erabilpena, teknologia digitalaren integrazioa eta zerbitzu publiko digitalak.

Euskadik %61,54ko indizea du, hau da, EB-28ko herrialdeak biltzen dituen sailkapeneko zazpigarren tokian dago, herrialde horien batez bestekoa %52,49koa delarik.Hauexek dira sailkapenaren buru dauden herrialdeak (%70 inguruko kopuruak dituztenak): Finlandia (%72,31), Suedia (%69,74), Danimarka (%69,15) eta Herbehereak (%67,69).

Aztertzen baditugu interneteko zerbitzuen erabilera, herritarrek sareari ematen dioten erabilera eta egiten dituzten onlineko jarduerak eta transakzioak, ikusiko dugu Euskadi EBren batez bestekoaren azpitik dagoela, oso atzean geratu delarik sailkapenean (24. postuan).

Azterlanaren emaitzetatik ondorio argi bi ateratzen dira.Lehenik eta behin, euskal gizartearen eta ekonomiaren digitalizazioak “hazkunde egonkor eta sendoaren bidetik jarraitzen duela”.Eta, bestetik, “politika digitalak, batik bat Euskadiko 2020ko Agenda Digitala, lagungarri izan direla lorpen horiek erdiesteko orduan”.

orkestra.deusto.es