Suediako Chalmers Unibertsitate Teknologikoko ikertzaileek kontrol mentalaz hornitu dute besoko protesia, erabiltzaileak gai izan daitezen esku artifizialak ukitzen duena sentitzeko. Protesi hauek hezurrari atxikitzen zaizkio, nerbio eta giharretan inplantatutako elektrodoek kontrolatzen dituzte, eta protesi arruntak baino askoz zehatzagoak dira. Ukimenaren sentsazioa lortzen da anputatu baino lehen esku biologikoarekin konektatuta zeuden nerbioak estimulatuz.

Horrez gain, protesiaren hatz lodian indar-sentsoreak daude, zeintzuek objektu batekiko kontaktua eta aplikatutako presioa neurtzen baitute objektu hori eusteko unean. Datu guztiak nerbioetara bidaltzen dira eta haiek garunera eramaten dituzte, pertsonari esku protesikotik datorren informazioa helaraziz.

Protesiaren barruan kokatutako sistema batek adimen artifizialeko algoritmo birfinduak erabiltzen ditu mugimendua kontrolatzeko. Horrela lortzen da pertzepzio oso bat, esku biologikoaren nahiko antzekoa dena.

Suediako hiru paziente teknologia berri honekin (gizaki eta makina arteko munduko interfaze integratuenetako bat da) bizi izan dira zazpi urtez, eta baieztatu dute eraginkorra eta erabilgarria dela. Kontzeptu berri bat da gorputz-adar artifizialentzat, eta protesi neuro-muskulu-eskeletiko deitzen dira, konektatuta daudelako erabiltzailearen nerbio, gihar eta hezurretara.

tendencias21.net