Sare konplexuen teoria eta biki digitalak integratzean, badago sistema biologikoen portaera unean bertan simulatzerik eta banakako iragarpenak nahiz jarduketak egiterik.

“Gaur egun, ikaskuntza automatikoaren eta bihotzeko biki digitalen arteko sinergiak daudenez, doitasunezko medikuntza egin daiteke kardiologian. Bi teknologiak bateratzean, zehaztasun handiz aurreikusi dezakegu bihotzeko zenbait gaixotasunetan bat-bateko heriotzarako dagoen arriskua, eta banakako tratamenduak garatu ditzakegu arritmiadun gaixoentzat”.

Horixe bera uste du Baltimoreko Johns Hopkins Unibertsitateko AI Research: Health and Medicine, Data Science and AI Institute laborategiko zuzendaria den Natalia Trayanovak. Orain dela egun batzuk, Ramón Areces Fundazioak eta Springer Naturek antolatutako 'Zientzietako Hitzaldien eta Eztabaiden XVII. Zikloan' parte hartu zuen Trayanovak. Ekitaldi horretan, biomedikuntzan ezarritako biki digitalen arloko lau aditu bildu ziren, garapeneko zer unetan gauden eta nolako aurreikuspenak dauden aztertzeko.

“Ez litzateke zoragarria izango geure ordezkari digitala edukitzea, medikuek gure historia medikoa eta osasun-egoera simulatzeko aukera izan dezaten, big datan ezagunak diren elkarreraginen eta gaur egungo jakintza biofisikoen bidez?", bere buruari galdetu zion Trayanovak. “Geure erreplika birtualak gure gaixotasunaren ibilbidea iragarri lezake, aurkako gertaeren inguruko arriskua zenbatetsiko luke eta tratamenduari emandako erantzuna aurreikusiko luke. Hori guztia oso lagungarria izango litzateke erabaki terapeutikoak hartzeko orduan”, erantzun zion bere buruari.

Aurrerakuntza horien abantailen artean, Trayanovak nabarmendu egin zuen “teknika horiek ezartzen direnean, etorkizunean berriro ospitaleratzeko prozesuak eta prozeduren errepikapenak ekiditen direla. Horrela, tratamendua aukeratzen denean, helburua ez da pazientearen gaur egungo egoera bera, pazientearen biharko egoeraren hobekuntza baizik”. Beraz, “biki digitalek etorkizun bikaina dute medikuntzan”, iragarri zuen. Horrez gain, Trayanova honako hauxe ere badela esan beharra dago: Ingeniaritza Biomekanikoko Murray B. Sachs katedraduna, Matematika Aplikatuko zein Estatistikako katedraduna eta Alliance for Cardiovascular Diagnostic and Treatment Innovationeko (Advance) zuzendaria.