Ia hamabi orduz hogeita hamar parte-hartzaile baino gehiagok (zientzialariak, ingeniariak, inbertitzaileak, kazetariak, soziologoak eta ekintzaileak) mahai-inguru eta hitzaldietan aztertu zituzten beren esparruko joerak, gizateriaren etorkizuna nolakoa izan den imajinatzeko.

Hizlarietako batzuk besteen gainetik nabarmendu ziren, euren iragarpen ausartengatik. Aubrey de Grey-k, birsorkuntzako medikuntzako adituak, iragarri zuen 2050ean 150 urteraino luzatuko dela bizi-itxaropena, prebentziozko medikuntzari esker. Bere esanetan, prebentziozko medikuntza auto klasiko bati egiten zaion mantenimendu trinkoaren antzekoa da. Bestalde, Jaron Lanier-ek ?berea da errealitate birtual terminoa- adierazi zuen beldurra galdu behar zaiola adimen artifizialari, esanez oso urrun dagoela gizakion adimena gainditzetik. Kevin Esvelt bio-kimikariak segurtatu zuen hemendik gutxira, ingeniaritza genetikoari esker, desagerrarazi egingo direla milioika gizakik jasaten dituzten gaixotasunak (adibidez malaria), gaixotasun horiek transmititzen dituzten espezieen geneak aldatuta. Beste iragarpen batzuen arabera, ingeniaritza genetikoak gaixotasun hereditarioak desagerrarazteko balioko du eta funtsezkoa izango da espazioa esploratzeko eta Marte kolonizatzeko.

Baina eztabaidetan parte hartu zuten moderatzaileak eta entzuleak askoz eszeptiko eta zuhurrago agertu ziren. Entzuleen galderei esker, saioen ondoren errealitateari lotuago dauden bestelako eztabaidak sortu eta gai polemikoak landu ziren: hala nola, osasun arloko aurrerapenak eta teknologiaren abantailak eskuratzeko eskubide unibertsala, automatizazioak eragindako enplegu galera edota eugenesia berri bat agertzea, zeinaren bitartez, azkenean, giza eskubideak urratu baitaitezke.