Sakelako malgua

Infinity Flex Display pantailak esperientzia mugikor berri bat eskainiko du, zeinarekin erabiltzaileek aukera izango baitute gauza berriak egiteko, orain terminal konbentzionalekin egin ezin direnak. Telefono konpaktua izango da, banda batekin zabaltzen dena; hala, pantaila inguratzaile handiago bat lortzen da (7,3 hatz-beteko tablet baten tamainakoa), aukera ematen duena hainbat zeregin egiteko eta edukiak bistaratzeko. Ixten denean telefono arrunt bat bezala erabiltzen da.

5G

5G teknologiaren zabalkundeak gaitasun berriak eskainiko ditu konektatutako gailu guztientzat: konexio masiboak eta abiadura ultra-azkarrak.

Zibersegurtasuna

Erasotzaileek gailu konektatuen ezaugarriak aztertzen jarraituko dute ahulune berriak aprobetxatzeko. Baina ez da hori izango urte berriko kezka bakarra. Adituek diotenez, arazo larriak izango ditugu 2019an, batik bat datuen babesari eta pribatutasunari dagokienez.

Adimen Artifiziala

AAk ez du atseden hartzeko premiarik, etengabe eta askoz azkarrago lan egin dezake (gizakiak urtetan lortuko lituzkeen ezagutzak eta gaitasunak eskuratu ditzake) eta, gainera, errore-marjina oso txikia du. Datuak nagusi diren mundu batean, ongi prestatuta daudenek bakarrik biziraungo dute.

Baina AAk badu hain atsegina ez den alderdi bat ere. Erronka berriei aurre egiteko, ezinbestekoa da berriro heztea aurrerapen honek langabezian utziko dituen milioika pertsonak (Txinak aurten AA bidezko telebista aurkezle bat sortu du), teknologien eta robotikaren erabilpen etikoa eta morala lantzea, eta prebentzio lana egitea teknologiak sor ditzakeen adikzioak eta nahasteak tratatzeko, gizartea horrelako arriskuen menpe egongo delako.

Blockchain

Indra-k “2019rako joera teknologiko estrategikoak” txostenean dioen bezala, blockchain teknologian datuak banatu egiten dira zerbitzari desberdinen bitartez eta ez ditu erakunde bakar batek kudeatzen, informazioa deszentralizatua dagoelako (bankuen monopolioa desagerrarazteko); datuak ezin dira aldatu (aldagaitzak dira) eta kriptografikoki babestuta daude, hau da, seguruak dira.

Esperientzia “murgiltzaileak”

Errealitate birtuala errealitate handituarekin eta mistoarekin uztartzean esperientzia murgiltzaile berriak sortuko dira. Hau da, bideo-jokoetan jokatzeko ez da nahikoa izango erabiltzaileak errealitate birtualeko betaurrekoak janztea. Lehen eskutik sentitu nahi du inguru osoak dar-dar egiten duela eztanda bat edo tiro bat gertatzen denean. Ez hori bakarrik, janaria usaindu ahal izango du 360 graduko jangelak dituzten eta esperientzia gastronomiko berri bat eskaintzen duten jatetxeetan.

Zenbait hotel katek dagoeneko eskaintzen dute aukera logela aldatzeko eta 4D esperientzia murgiltzaileak bizitzeko errealitate birtualeko banakako dispositiborik gabe. Ikus-entzunezko proiekzio sistema horrekin esperientzia inguratzaileak bizi daitezke: itsas hondora bidaiatu, Lurraren gainean hegan egin espazio-ontzi batean… eta hori guztia bideo-joko baten mundu birtualean.

Konputazio kuantikoa

Ordenagailu baten indarra handitzeko, besteak beste, bit kopurua handitu behar da. Mekanika kuantikoari esker, zientzialariek bit kuantikoa sortu dute: qubit du izena eta informazio unitate horrek ez dauka 0 edo 1 baliorik, baizik eta biak izan ditzake aldi berean. Hala, konputazio kuantikoarekin milioika kalkulu egin ahal izango dira une berean.

iproup.com