Ez da erraza osasun arloko berrikuntza digitalen kopurua mantendu eta ugaritzea. Azken hamarkadetan sortutako 600dik gora ekimenetatik oso gutxi iritsi dira eskala handira eta are gutxiagok lortu dute sostengarri izatea. Nolanahi ere, profil altuko ekimen digital batzuek lortu dute –partzialki bada ere-, emaileen finantzaketatik Estatuaren finantzaketara pasatzea. Aldaketa hori une honetan bizi dugun joera bati zor zaio, askok uste baitute teknologia berriek badutela potentziala osasun sistemak eta, aldi berean, osasuna hobetzeko.

Dagoeneko hainbat urrats eman dira osasunarekin lotutako teknologia digitalei indarra emateko. Osasunaren Munduko Erakundeak (OME) duela gutxi iragarri zuen Osasun Digitalaren Saila sortuko zuela eta esparru horretako esku-hartzeek jarraitu beharreko zuzentarauak emango zituela.

Are gehiago, dagoeneko martxan daude etorkizun handia izan dezaketen hainbat ekimen. Adibidez, Ghana, Hegoafrika eta Tanzaniako gobernuak etekina ateratzen ari zaizkio sakelako telefonoa eskuratzeko ia erabateko erraztasunari. Herrialde horietako biztanleek ez dute aukera handirik osasun arloko profesionalen arreta jasotzeko eta telefonoaren bidez posible dute osasun arloko profesionalekin elkarreragitea, osasunari buruzko informazio garrantzitsua bidaltzen baitzaie ekimenaren onuradunei.

Bestalde, osasun hornitzaileei tresna digitalak eskaintzen dizkieten ekimenak lagungarri dira paperezko erregistro korapilatsuak desagerrarazteko eta zerbitzuaren eduki klinikoa hobetzeko (erabakiak hartzen laguntzeko algoritmoak, bideoak eta paziente-hornitzaile arteko elkarreraginetan laguntzeko beste material batzuk). Era berean, lanean ari dira bloke-kateen teknologia erabiltzen hasteko; sistema hori baliagarri izango da finantzaketa-fluxuen jarraipena egin eta osasun arloko langileei dagozkien ordainketak egiteko.

elpais.com