Material horiek 3D matrize gisa erabil daitezke hezurrak eta kartilagoak birsortzeko, eta oso baliagarriak izan daitezke birsorkuntzako medikuntzan, esaterako osteoporosia, artritisa edo artrosia duten pazienteentzat. Gainera, gaixotasun horiek inpaktu ekonomiko handia dute, biztanleriaren batez besteko adina ere gero eta handiagoa delako.

Sagar hondakina lehengai ugaria da. 2015ean hirurogeita hamar milioi tonatik gora sagar ekoitzi ziren munduan, hamar milioi Europar Batasunean eta milioi erdi bat Espainian. Sagarraren pisuaren %75 inguru zuku eta elikagai bihur daiteke; gainerakoak berriz ?sagar patsa deitzen zaionak-, %20-30 materia lehor dauka eta animaliak elikatzeko material merke gisa erabiltzen da gehienbat.

Bestalde, hondakin horrek ur asko dauka, eta arazotsua da biltegiratzeko, unean bertan tratatu behar izaten delako eta energia asko gastatzen delako usteldu ez dadin. Beraz, badaude ingurumen arloko pizgarriak eta pizgarri ekonomikoak horrelako hondakinak balio erantsiko amaierako produktu bihurtzeko.

UPM eta CSICeko ikerlariek prozedura bat garatu dute sagar patsari beste balio bat emateko, molekula bio-aktiboak sekuentzialki erauziz ?antioxidatzaileak edo pektina; prozesu horren amaieran lortzen den hondakinarekin bio-material bat prestatzen da, porositate eta testura ezaugarri egokiak dituena ehunen ingeniaritzan erabiltzeko.

upm.es