Aplikazio honek gure aztarnei jarraitzen die, non egon garen eta norekin topo egin dugun jakiteko, eta gero datu pertsonal horiek partekatzen ditu beste erabiltzaile batzuekin, betiere pribatutasuna mantenduz. Informazio hori lagungarri izan liteke COVID-19aren hedapena geldiarazteko, tresna sortu duen MIT Media Lab-eko (AEBak) lantaldeko lider, Ramesh Raskar-ek azaldu duenez. Private Kit: Safe Paths izeneko aplikazio hori doakoa eta kode irekikoa da, eta MITeko eta Harvard Unibertsitateko (AEBak) ikertzaileek garatu zuten, Facebook eta Uber bezalako konpainietako software ingeniariek lagundurik, zeintzuek euren denbora librean lan egin baitzuten.

Pribatutasun arloko kezkak: Osasunaren Mundu Erakundeak (OMS) eskatu du neurri zorrotzak har daitezela koronabirusaren hedapena geldiarazteko. Horrek esan nahi du infektatutako pertsonak identifikatu eta isolatu behar direla baina, horrez gain, kutsatutako pertsona horiek non eta norekin egon diren aztertu behar dela, pertsona horiei guztiei testak egiteko eta toki horiek guztiak desinfektatzeko. Zenbait herrialdetan, adibidez Txinan, pertsonen telefonoetatik ateratzen zituzten datu horiek, eta Gobernuak prozesatzen zituen. Baina gobernuaren zaintza hori aplikatzea zaila litzateke Estatu Batuak edo Espainia bezala demokratikoagoak diren herrialdeetan. Gainera, kontuan hartu behar da COVID-19a duten pertsonek estigma soziala jasan dutela, horra beste arrazoi bat euren nortasunari buruzko informazioaren pribatutasuna mantentzeko.

Private Kit: Safe Paths aplikazioak pribatutasun arazoak saihesten ditu, kokapenaren datu zifratuak telefono desberdinen artean partekatzen dituelako sare baten barruan, hau da, ez dira igarotzen agintaritza zentral batetik. Horri esker, erabiltzaileek jakin dezakete koronabirus eramaile batekin kontaktuan egon diren ala ez (betiere eramaileak informazio hori partekatu badu), baina eramailea nor den jakin gabe. Koronabirusean positibo ematen duten erabiltzaileek aukera izango dute, nahi izanez gero, euren kokapen datuak osasun agintariekin partekatzeko, eta publiko egin ahal izango dituzte gero.