G7ko herrialdeek iaz Montrealen (Kanada) egin zuten gailurrean, Justin Trudeau Kanadako lehen ministroak eta Mounir Mahjoubi Frantziako sektore digitaleko estatu idazkariak iragarri zuten euren asmoa zela Adimen Artifizialeko Nazioarteko Panel bat sortzea adimen artifizialak izan ditzakeen ondorioak eztabaidatzeko.

Trudeau-ren bulegoak argitaratutako aginduaren arabera, nazioarteko koalizio horretan bilduko dira AAko ingeniariak eta beste adar batzuetako zientzialariak, teknologiak ekar ditzakeen arriskuak aztertzeko eta herrialde parte-hartzaile guztien artean neurri egokiak diseinatzeko.

Konferentziaren amaieran, agintariak hauxe esan zuen: “Kanada mundu mailako lider izango bada adimen artifizialaren arloan, paper garrantzitsua jokatu behar dugu arlo horrek berekin dakartzan kezka etiko batzuk jorratzeko”. Trudeau-k eta Frantziako presidente Emmanuel Macron-ek 2018aren hasieran iragarri zuten elkarlanean ariko direla gai honen inguruan, baina oraindik ez dute xehetasun gehiagorik eman.

Mahjoubi-k azaldu zuenez, panelak AAren eta arma autonomoen etika jorratuko lituzke, nahiz eta azken hori dagoeneko baden nazioarteko eztabaidagai bat. Halaber, azpimarratu zuen koalizio horrek nazio guztiak gonbidatuko zituela, Txina barne, teknologia honen inguruko estandarrak eta arauak lantzeko. Txina askotan kritikatu izan da oso azkar ari delako AA inplementatzen zaintza- eta polizia-lanetarako. Arduradunak hauxe esan zuen: “Txinarekin hitz egin behar genuke honi buruz? Jakina. Gure ardura ere bada balore-multzo komun bat sortzea, balore horiek ozenki aldarrikatzea eta erakustea gure balore-sistemak oihartzun handiagoa duela”.

technologyreview.es