Adecco-k, Insead negozio eskolak eta Human Capital Institute-k Davos-en aurkeztu duten azterlanak dio Espainiako lau hiri (Madril, Bartzelona, Bilbo eta Zaragoza) nabarmentzen direla talentua ondoen kudeatzen duten munduko hirien artean.
Txostenaren arabera, Madril da lehenengoa Espainia mailan, eta seigarrena mundu osoko rankinean; atzetik datoz Bilbo (18. postuan), Bartzelona (20), eta Zaragoza (30).

Lehiakortasunaren eta Talentuaren Munduko Indizeak (GTCI dira ingelesezko siglak) aztergai du nola kudeatzen duten herrialdeek talentua, horretarako kontuan hartzen duelarik nolako gaitasuna duten talentu hori erakarri, handitu eta atxikitzeko. Gainera, bi talentu maila bereizten ditu, honela laburbiltzen direnak: erdi-mailako trebetasunak (lanekoak eta bokaziozkoak) eta goi-mailako edo ezagutza globaleko trebetasunak.

Kontua da talentua dela munduko lan merkatuko dibisa nagusia. Eta faktore hori oso kontuan hartu behar dute enpresetan eta mundu akademikoan erabakiak hartzen dituztenek, eta baita ere politikak formulatzen dituztenek.
Horregatik, erakundeek gero eta garrantzi handiagoa ematen diote talentua atxiki eta lantzeari.

Azterlanaren arabera, Madril da, Parisekin batera, 2 milioitik gora biztanleko hiri bakarra posizio onena duten hamar hirien artean. Madril zazpigarren postuan dago talentu hazkundeari dagokionean, eta Bilbo eta Bartzelona lehenengo hamarren artean kokatu dira talentua atxikitzen dakiten hirien zerrendan, aipatzekoa delarik Bilbok bigarren postua lortu duela.

adecco.es