Miajadas Telecom enpresak (Laura Otero Taldeko filiala) garatu du sistema hori. Miajadas Telecom telekomunikazioetan espezializatutako enpresa bat da, bere I+G+B esparrua duena.

Enpresa horrek sortu du Riega-T, urruneko kontrolerako gailu bat, ureztatze-sistemetako hodiak kontrolatzen dituzten balbuletan koka daitekeena eta nekazariari denbora errealeko informazioa ematen diona: presioa, emaria, PHa, hezetasuna, tentsioa, e.a.

Parametro horiek dispositibo mugikorretarako aplikazio batean eta ordenagailuan bistaratzen dira. Gainera, arazoren bat sortzen denean, programak aukera ematen du horren araberako ekintzak garatzeko. “Lehen nekazariak ezin zuen jakin zer gertatzen ari zen soroan bera ez zegoenean. Adibidez, ur-mozketa batek galera handiak eragin zitzakeen udan, baldin eta nekazaria ez bazen sorora hurbiltzen egun pare batean. Dispositibo honek ureztatze-sistema abiarazi edo geldiarazi dezake etxetik, eta aukera ematen du emarien presioa kalkulatzeko, hodi batek behar bezala funtzionatzen duen ala ez egiaztatzeko, e.a.” azaldu du Pérezek.

Sistema honen abantaila garrantzitsuetako bat da erraz egokitzen dela, sarrera-irteeretarako sentsore desberdinak dituen xafla modular batean oinarritzen delako. Oinarrizkoenak posible egiten du sentsore nagusiarekin komunikatzea. Ureztatze-instalazio guztietan dago balbula nagusi bat, uraren pasabidea irekitzen eta ixten duena. Riega-T sistemak balbula horren pasabidea kontrolatzen du, baita irteerako presioa ere, eta sarkinentzako sentsore bat du, etxola ireki dela detektatzeko. Gainera, horrelako sistema gehienek eguzki-xafla txiki batekin funtzionatzen dute eta Miajadas Telecom enpresaren proiektu honek erradiazioa eta bateria ere neurtzen ditu.

hoy.es