Alde horretatik, adituek adierazten dutenez, hodeiak funtsezko garrantzia izango du etengabe bilakatzen ari den industria berri horretan. Enpresek eta instituzioek dirutza handia inbertitzen jarraituko dute abantaila asko eskaintzen dituen azpiegitura digitalean; esate baterako, makinaren portaera zein erantzunak behatzea, erabakiak hartzeko analisiak egitea eta prozesuak zein baliabideen kontsumoa ere hobetzea.

Horrez gain, hodeian bertan ere, geure lana garatzeko moduko ekosistema informatiko fidagarria integratu beharko da. Arloko adituek argi eta garbi adierazi dute bertan ezarritako behagarritasuna gero eta garrantzitsuagoa izango dela, horrelaxe modu antolatu eta integratuan atonduko liratekeelako erakundeko funtzio, aplikazio, azpiegitura eta eragiketa guztietan behatu daitezkeen datu guztiak. Teknika berri horri esker, datu historikoak integratzen dira gaur egungo sistemetan, baina, era berean, unean uneko erantzuna ere ematen zaie eragiketen lantegian gertatu daitezkeen aldaketei.

Dena dela, 4.0 industrian egiten diren eragiketen izaeraren ondorioz sortutako abantaila horiek guztiek badute arrisku handirik, zibererasoak, alegia. Hori dela eta, zibersegurtasuna da egin beharreko inbertsio handienetakoa.

Gardentasuna eta konfiantza beste joeretako bat dira. Hau da, 'blockchaina' mundu industrialera eta hornikuntza-katera ere iritsi da. Hartara, muturretik muturrerako gardentasuna eta trazagarritasuna gero eta garrantzitsuagoak dira, baina, batez ere, araututa dauden edo hornikuntza-kate konplexuak dituzten sektore industrialetan.

Gainera, adimen artifiziala arlo guztietan sorrarazten ari den iraultza handia alde batera utzita, ekoizpen industrial adimendun aurreratueneko beste joera eztabaidaezin bat XR teknologiak gailu mugikorren bidez erabiltzea da; esate baterako, errealitate mistoa, errealitate areagotua eta errealitate birtuala, eragin handi-handia dutelako fabrikazio industrialeko sistemetan.

diariovasco.com