Espainia eta Portugaleko hainbat zentrotako –Valentziako Unibertsitate Politeknikoa (UPV), Alacanteko Unibertsitatea eta Universidade do Minho (Portugal)- ikerlariek elkarrekin garatutako proiektu bat da, Efe agentziak UPVtik jaso dituen datuen arabera. Gainera, Pharos robotaren asmoa da aldian behin ariketa fisiko pertsonalizatuak gomendatzea, azpimarratu du Vicente Juliánek, UPVko Teknologia Informatiko eta Adimen Artifizialeko Taldeko ikertzaileak.

NBEk munduko biztanleriaren eboluzioari buruz egin duen azken txostenaren arabera, biztanleriaren %13k 60 urte baino gehiago ditu, eta portzentaje hori ia bikoiztu egingo da 2050erako, %25eraino iritsiko delarik.

UPVko kideek gaineratu dute teknologiek egokitu egin behar dutela aldaketa demografikora eta testuinguru horretan sortu zela Pharos proiektua, arestian argitaratu dena Sensors aldizkarian: robot interaktibo bat da, pertsona nagusiei eguneroko ariketa fisikoak etxean egiten lagunduko diena.

Pharos-ek Pepper robot komertziala du oinarritzat, baina ikertzaileek bi modulu gehiago txertatu dizkiote: lehenak erabiltzaile bakoitzari egokitutako ariketa-programa bat gomendatzen du, eta bigarrenak ariketa nola egin den ebaluatzen du, erabiltzailea ongi ari dela egiaztatuz (adimen artifizialeko teknika aurreratuak erabiltzen ditu horretarako).

Pharos robotak badu antzeko beste sistema batzuetatik bereizten duen ezaugarri nagusi bat: ikertzaileek diotenez, “oso hurbiletik jarraitzen ditu erabiltzaileak” eta gai da esateko ariketak ongi egiten dituzten ala ez. Diotenez, “oso tresna baliagarria da zaintzaile eta laguntzaileentzat, oso erraz ikus dezaketelako erabiltzaileak gaitasun gutxiago duen zenbait ariketa egiteko, ongi jakinik gaitasun gutxiago hori arazo fisiko edota kognitibo progresiboen adierazle izan daitekeela”.

efefuturo.com