Ikusirik nolako inpaktua duten hondakinek naturan eta ongi jakinik prebentzioa ezinbestekoa dela esparru guztietan, TheCircularLab-ek (Ecoembes agentziaren ekonomia zirkularreko berrikuntza zentroa) plastikozko material berri bat aurkeztu du, ontzi gero eta sostengarriagoak egiteko konpromisoari jarraiki. Material horrek oinarri biologikoa du –hau da, landare-hondakinak erabiliz sortzen da, esaterako patata azalak edo beste edozein landareren hondakinak, eta ez petrolioa-, konpostagarria eta birziklagarria da eta itsasoan biodegradatzen da.

AINIA teknologi zentroarekin batera garatutako plastiko sostengarri hau deskonposatzen ari den materia organikoz egiten da %100ean eta benetako iraultza baten oinarriak ezarri ditu ekonomia zirkularraren arloan. Gainera, litekeena da alternatiba bat izatea udal merkatuetan eta horrelako elikagai kopuru handiak sortzen dituzten bestelako instalazioetan sortzen diren hondakinentzat, birziklatzeaz gain, elikagai gutxiago xahutzeko ere balio duelako.

Horrelako plastikoak (PHBV edo PoliHidroxiButilValeratoa) sortzeko prozesua, berriz, prototipo fasean dago oraindik: landare-hondakinak birrindu egiten dira eta glukosa kentzen zaie, azken hori erabiltzen delarik ontziak fabrikatzeko biopolimeroa ekoizten duen mikro-organismoa elikatzeko. Iturri begetaletakoak ez diren beste plastiko batzuk bezalaxe erabil daiteke elikagaiak edota edariak ontziratzeko. Baina haiek ez bezala, birziklatu egin daiteke, baita konpostatu ere, eta itsasoan biodegradatu ahal izango da.

economiacircular.org