Adimen artifizialaren (AA) iraultzaren ahaztutako heroietako bat da ImageNet datu-base ia ezezaguna. Princeton Unibertsitateko (AEBak) ikerlariek sortu zuten ImageNet 14 milioi irudi ingururekin, eta haietako bakoitzak irudian agertzen dena azaltzen duen testu kolaboratibo bat du atxikita.

Zergatik da garrantzitsua datu-base hori? Bada, gaur egungo sare neuronal ahaltsuenetako asko entrenatzeko erabili delako. Sare neuronalek irudiak eta haiekin doazen testuak ikusiz ikasten dute. Datu-basea zenbat eta handiagoa izan, orduan eta gehiago ikasten dute. ImageNet eta hura bezalako datu bisualen beste multzo batzuk gabe, sare neuronal ahaltsuenek ere ezingo lukete ezer errekonozitu.

Orain, robotikako adituek diote antzeko saiakera bat egin nahi dutela, baina bideoekin. Itxuraz, makinei erakutsi nahi diete ingurunearekin nola elkarreragin. Berkeley Unibertsitateko (Kalifornia, AEBak) Sudeep Dasari ikerlaria eta bere lankideak RoboNet izeneko datu-base bat sortzen ari dira, bideoz eta ekintzak garatzen dituzten robotei buruzko azalpenez hornitua. Adibidez, datu-base horretan egon litezke mahai baten gainean katilu bat mugitzen duen robot baten hainbat eszena. Asmoa da datu horiek edonork deskargatzeko moduan jartzea, makina batek lehenago katilu batekin inoiz elkarreragin ez badu ere, sare neuronala entrenatu dezan ekintza bera egiteko.

Dasari eta bere lankideek espero dute RoboNet baliabide aproposa izango dela ia edozein robot entrenatzeko eta ia edozein lan egiten ikas dezan. Sortzaileek diotenez, robotentzako unibertsitate moduko bat izango da.

technologyreview.es