Betiko semaforoak ezin dira egokitu ibilgailuen denbora errealeko premietara: beti dute tenporizadoreetan oinarritutako kadentzia bera, edozein dela ere trafikoaren dentsitatea edo kalean dabilen oinezko kopurua. Egia da zenbait tokitan badaudela bestelako semaforoak, egunez eta gauez desberdin funtzionatzen dutenak. Baina semaforo adimendunek kontuan hartzen dute zenbat ibilgailu eta oinezko dauden zain zebra-bidean.

Zenbait hiri eta enpresa hasi dira proposamenak garatzen semaforoak hobetuz hiri adimendunak lortzeko.

Londresek, adibidez, semaforo adimendun kopurua ugaritu nahi du –dagoeneko badauzka batzuk instalatuta- hiri osoan nola funtzionatzen duten probatzeko. Erresuma Batuko hiriburuaren helburua da lehentasuna ematea oinezkoei eta joan-etorrietarako bizikleta erabiltzen dutenei. Azken urteotan, Transport for London agentziak urtero berrikusi ditu seinaleztatutako 1.200 bide-gurutzeetan itxaron beharreko denborak. Sentsoreei eta adimen artifizialari esker, semaforoek auto-fluxuari eta oinezko kopuruari buruzko informazioa jaso eta aztertzen dute, ondorioak ateratzen dituzte patroiei buruz eta argiak aldatzen dituzte denbora errealean.

Horrelako semaforoak gai dira jakiteko zenbat oinezko dauden zain bide-gurutze batean eta automatikoki egokitu dezakete argizko seinalearen denbora, ahalik eta denbora gutxien itxaron dezaten eta behar adina asti izan dezaten errepidea gurutzatzeko. Asmoa da beste 10 bide-gurutzetan trafikoko seinaleak erabiltzea lehentasuna emateko oinezkoei bide-gurutzean. Hala, zebra-bidera iritsi bezain laster, semaforoak automatikoki gorri jarriko dira autoentzat, oinezkoei pasatzen uzteko.

elpais.com