Berebiziko interesa dago gidatze konektatu eta autonomoko aplikazioak garatzeko, sekulako potentziala dutelako mugikortasun sistema seguru, garbi, eraginkor eta sinpleago bat sortzeko. Europan hainbat proiektu pilotu daude martxan garraio publikoan ibilgailu autonomoak sartzeko. Horietako bat da Europako funtsekin finantzatutako PRoPART programa, non ibilgailu automatizatuak eta gidatzen laguntzeko sistema aurreratuak (ADAS) aztertzen ari baitira. Hala, proiektuaren aurkezpen batean azaldu zen bezala, proiektu horrek proposatzen du «disponibilitate handiko posizionamendu-teknologia bat garatu eta frogatzea gidatze automatizatuko aplikazioentzat».

Proiektuaren prentsa oharrak dio garatzen ari diren ibilgailu konektatu eta automatizatuen aplikazioek «teknologia desberdinak uztartzen dituztela ibilgailu batek errepidean eta askotariko oztopoekiko duen benetako posizioa zehazteko». Horrez gain, hauxe dio: «Teknologia bakar batek ezin ditu bere kabuz konpondu egoera guztiak eta teknologia desberdinak konbinatzen direnean, funtsezkoa da informazio guztia bere osotasunean ulertzea. Hauxe da PRoPART proiektuak frogatuko duen teknologia: autobide batean modu automatizatuan gidatu dezakeen kamioi batean garatutako posizionamendu-teknologia».

PRoPART (Precise and Robust Positioning for Automated Road Transports) proiektuak 2019aren amaierara arte jarraituko du. Bazkideen iritziz, PRoPART baliagarria izango da ibilgailu astunetarako ekipo orijinalen fabrikatzaileentzat (OEM), lehen mailako hornitzaileentzat (hau da, OEMei ordezkoak edo sistemak zuzenean helarazten dizkieten enpresak), objektu mugikorren Interneteko hornitzaileentzat, mikro-txipen fabrikatzaileentzat eta robot autonomoen fabrikatzaileentzat.

cordis.europa.eu