Mikrotxipen boom-a 2015ean iritsi zen Suediara, non beste inon baino txera hobea egiten baitzaie horrelako berrikuntza teknologikoei. Izan ere, Suedia liderra da biohacking edo transhumanismo mugimenduan egiten ari diren aurrerapenetan. Mugimendu horren xedea da teknologiaren bitartez gizateria hobetzea, teknologia hori ahalik eta gehien aprobetxatuz eta gorputzean integratuz.

Mikrotxip edo gailu txertagarrien kasuan (mikrotxipen bertsio hobetua), helburua da azalpean daramatzaten pertsonen eguneroko bizitza hobetzea. Esaterako, balio dute lantokira edo gimnasiora sartzeko, bulegoko vending makinatik produktuak ateratzeko edo treneko txartela baliozkotzeko eskuaren mugimendu bakar batekin. Hain zuzen, Suediar estatuaren SJ tren konpainia izan zen mikrotxipak txartel gisa erabiltzeko aukera eman zuen munduko lehen garraio enpresa. Duela urtebete inguru martxan jarri zenetik, 3.000 pertsona inguruk erregistratu dute SJ enpresaren leialtasun programako bazkide zenbakia euren inplanteetan.

Gailu horiek hatz lodiaren eta erakuslearen artean txertatzen dira xiringa baten antzeko injektore batekin, piercing-ak egiteko erabiltzen denaren antzeko prozedura bat baliatuz. Inplanteek Near Field Communication (NFC) teknologia darabilte (bankuko contacless txarteletan erabiltzen dena) eta pasiboak dira, hau da, ez dute bateriarik eta informazioa pilatzen dute beste dispositibo batzuek irakur dezaten, baina ezin dute beren kabuz informaziorik irakurri.

lavanguardia.com