Zaila da keinu soil batek emaitza hoberik ematea bazterkeria sozialeko arriskuan dauden pertsonen bizi-kalitatea hobetzeko. Etxebizitza sozialetan energia kontsumoa eta erosotasun-maila neurtzeko sentsoreak jarrita informazio oso baliagarria lortzen da, eta ongi erabiliz gero lor daiteke neguan hotzik ez pasatzea, ura aurreztea, CO2 gehiegi ez sortzea edo etxe bat birgaitzeko lanak behar bezala planifikatzea.

Mundu teknologikoaren eta gizarte ekintzaren arteko konexio estrategikoak bi protagonista ditu: batetik, Cellnex Telecom konpainia, haririk gabeko telekomunikazio zerbitzu eta azpiegituren Europako operatzaile handiena eta, bestetik, m4Social proiektuarekin lotutako lau erakunde, laurak Kataluniako Taula del Tercer Sector Social taldeko kideak.

Katalunia osoko 400.000 pertsona inguru pobrezia energetikoan bizi dira gaur egun, IDESCATek emandako datuen arabera. Zenbaki horien atzean daude krisi ekonomikoa, langabeziaren gorakada, soldata baxuak eta kostuen hazkundea.

Ekimena 2018an abiarazi zen, alderdi biek hitzarmen bat sinatu eta proiektu pilotu bat martxan jarri zutenean. Hala, sentsoreak jarri zituzten Bartzelona probintzian kokatutako alokairu sozialeko sei etxebizitzatan. Horien bitartez jakin zuten zenbatekoak ziren ur, argi eta gas kontsumoak, eta baita ere etxeetako tenperatura, hezetasuna eta CO2 mailak.

Datu horiek denak Cellnex-ek sortutako plataforma batean jasotzen dira, zeina Gauzen Interneten sarera konektatuta baitago. Sare hori Espainiako biztanleriaren % 95enganaino iristen da. Hau da, bi milioi dispositibo baino gehiagok erabiltzen dute egunero.

“Esperientzia oso positiboa izan da” dio Maurik, ikaskuntza prozesuaren bi adibide aipatuz. Lehena, neguko hilabete hotzetan oso tenperatura baxuan bizi izan diren familia batena eta, bigarrena, puntualki CO2 maila altuak izan dituen familia batena. Kasu horiek ezagututa, posible izan da familiei gomendioak ematea jakin dezaten nola erabili behar dituzten berogailuak edo nola aireztatu behar dituzten espazioak leihoak zabalduz.

elpais.com