Lausanako (Suitza) Eskola Politekniko Federaleko (EPFL) ikertzaileek software berri bat garatu dute hiriak beste modu batean planifikatzeko. Software horrek bere baitan integratzen ditu hiri sostengarriak diseinatzeko kontuan hartu beharreko helburuak (dentsitatea, bizi-kalitatea, kostuak, energia berriztagarriak) eta hiri-plangintzako aldaera onenak sortzen ditu. Aplikazio hori lagungarri izango da garapen sostengarria errespetatuko duten erabakiak hartzeko.

Aplikazioaren helburua da hiri-plangintzako tresna bat eskaintzea, plangintza egitean helburu asko hartu behar direlako kontuan, askotan kontraesankorrak, ez oso ezagunak eta kuantifikatzeko zailak: guneak dentsifikatzea, ondarea kontserbatzea, energia berriztagarriak erabiltzea, CO2 isuriak murriztea edo zerbitzu publikoen kostuak minimizatzea, adibidez.

Alternatiba guztiak modu sinplean eta ardatz bertikaletan bistaratzea lagungarri da planifikatzaileek ikuspegi orokor bat izan dezaten. Hala, plangintza batek izan ditzake planifikatzaileak lortu nahi dituen kostuak eta dentsitatea, baina gerta liteke plagintza horrek ez betetzea energia berriztagarriak erabiltzeko lege-estandarrak edo beste eraikin baten ikuspegiak oztopatzea. Aplikazio honetan, eragileek dinamikoki egokitu ditzakete helburu guztiak, denontzat onargarriak izango diren konponbideak identifikatzeko.

tendencias21.net