Europan 1,7 milioi ikertzaile eta 70 milioi zientzialari eta teknologia arloko profesional daude, eta datu zientifikoen munduko ekoizle handienetako bat da. Hala ere, azpiegitura zatikatu eta desegokia izan du orain arte, eta azpiegitura hori eragozpen handia izan da Europako ezagutza erabat aprobetxatzeko.

Gabezia hori gainditzeko, Europako Batzordeak Zientzia Irekiaren Europako Lainoaren sorrera sustatu du (EOSC ingelesezko sigletan). EOSC sortzeko ideia 2015ean gorpuztu zen, pentsatuz modu egokia izan zitekeela zientzia eta berrikuntza garatzeko Europan eta handik kanpo. EOSC-hub Europako funtsekin finantzatutako proiektu bat da, prozesu hori bultzatzeko eta ahalbidetzeko moduak bilatzen dituena.

EOSC duela gutxi aurkeztu zen Vienako Unibertsitatean. Ingurune birtual horren bitartez, diziplina anitzetako ikertzaileek datuak gorde, partekatu eta berrerabili ahal izango dituzte mugen gainetik. “Zientziak ez luke mugarik izan behar” adierazi zuen Carlos Moedasek, Europar Batasuneko (EB) Ikerketa, Zientzia eta Berrikuntzako komisarioak, Phys.org web orrian argitaratutako artikulu batean. Atari honek ezagutzaren ekoizpen eta hedapen irekia sustatzen du Europa osoan, horretarako elkarrekin lotzen dituelarik ikerketa-komunitate eta herrialde desberdinetako ikerketa-azpiegiturak. EBren zientziari buruzko ikuspegia islatzen du: zientziak gardena izan behar du, datuetan oinarritua, eta potentziala izan behar du EBko lehiakortasuna eta berrikuntza akuilatzeko. “Lainoa da zientzia irekiaren erakusgarri nagusia” gaineratu zuen.

EOSC atariak EOSC proiektuari buruzko informazio orokorra ematen du, finantzaketa aukerak azaltzen ditu eta zientzia eta ikerketa irekiaren arloko aurrerapen politikoen inguruko albisteak jasotzen ditu. Gainera, egin diren nahiz egingo diren ekitaldiei buruzko albisteak eta txostenak ere biltzen ditu. Erabilpen kasuei buruzko orri batean badira EOSC erabiltzeko adibide praktikoak, non ikusten den lainoaren zerbitzu eta baliabideak lagungarri izan daitezkeela ikertzaile eta berritzaileen eguneroko lanean. Zerbitzu eta baliabide zehatzei buruzko informazioa ere ematen du, zortzi kategoriatan banatuta: trukea eta aurkikuntzak; tratamendua eta analisiak; datuen kudeaketa; kalkuluak; biltegiratzea; sareko lana; prestakuntza eta laguntza; eta segurtasuna eta operazioak.

marketplace.eosc-portal.eu