Israeleko osasun antolakunde handienetako bat adimen artifiziala (AA) erabiltzen ari da jakiteko bere zerbitzupean dauden 2,4 milioi pertsonatatik nortzuk daukaten COVID-19agatik konplikazio larriak jasateko arrisku handiena. Maccabi Healthcare Services-ek dio adimen artifizialaren arloko Medial EarlySign konpainiarekin batera garatu duen sistema honek talde horretako kideen % 2 identifikatu dituela dagoeneko, hau da, 40.000 pertsona inguru. Identifikatu ondoren, diagnostiko-proba azkarrak egingo zaizkie.

AA hori aurretiko sistema baten bertsio egokitua da, gripea duten pertsonen artean konplikazioak izateko arrisku handiena dutenak identifikatzeko entrenatua. Ikertzaileek Maccabi-n duela 27 urtetik bildu diren milioika erregistro erabili zituzten entrenamendu hori egiteko. Iragarpenetarako, sistemak kontuan hartzen ditu hainbat datu mediko, besteak beste, adina, gorputz-masaren indizea (GMI), osasun arloko nahasteak (adibidez bihotzeko gaixotasunak eta diabetesa) eta aurreko ospitaleratzeetako aurrekariak. AA gai da erregistro ugari arakatzeko, eta arriskuan dauden eta beste era batean identifikatu ezingo liratekeen pertsonak detektatzeko.

Halaber, Maccabi-n AA erabiltzen dute jakiteko identifikatu dituzten pertsonek zein tratamendu maila beharko luketen gaixotuz gero: etxeko zaintza, berrogeialdia hotel batean edo ospitaleratzea. Antolakundeak dio hizketan ari dela AEBetako osasun zerbitzuen hornitzaile garrantzitsuenekin, zeintzuek AA hori erabili nahi baitute euren arrisku handiko pazienteen artean aplikatzeko.

technologyreview.es