Zeregin arriskutsuak garatzean, ebakuntza kirurgikoetan laguntzean eta logistika hobetzean, robotak oso lagungarriak dira arriskuak murrizteko eta eraginkortasuna handitzeko orduan. AAn oinarritutako sistemek osasunaren zaintza zein segurtasuna hobetzen dituzte, eta zereginak nahiz eragiketak arintzen dituzte. Hori dela eta, lan-karga arindu eta berrikuntza sustatzen da, baita tradizioari begira oso teknologikoak ez diren sektoreetan ere. Txostenean, ordea, azpimarratu egiten da politika proaktiboak jarri behar direla abian, teknologia horiek segurtasunez eta berdintasunez ezartzen direla bermatzeko.

Txostenean adierazten denez, honako hauexek segurtasuna zein osasuna eraldatzen ari dira, istripuak prebenitzean eta esposizio arriskutsuak murriztean: robotika eta automatizazio aurreratuak, errealitate birtual zein areagotuaren erabilera, arriskuak unean bertan antzematen dituzten postuak zuzentzeko gailu adimendunak bezalako tresna berriak edo airearen kalitatea miatzen dituzten ingurumen-sentsoreak. Horrez gain, digitalizazioaren bidez urrutiko lan-modalitate hibridoak areagotzen direnez, malgutasuna sortu eta osasun mentala hobetzen da.

Nolanahi ere, aurrerakuntza horien ondorioz badago arrisku berririk sortzerik. Izan ere, robotek zeregin arriskutsuak garatzen dituzten bitartean, makina horiek mantentzen, konpontzen edo haien bidez lan egiten duten langileek arrisku berriak pairatu ditzakete. Roboten ezusteko portaerek, sistemako akatsek edo zibermehatxuek segurtasuna jarri dezakete arriskuan. Honako honexen ondorioz sortu daitezke arrisku ergonomikoak: gizakien eta roboten arteko elkarreragina eta wearableen nahiz exoeskeletoen erabilera, behar den moduko doikuntzarik, erabilgarritasunik edo erosotasunik ez dutelako.

Txostenean bertan ere, azaldu egiten da langileek nolako arriskuei aurre egin behar dieten segurtasunaren eta osasunaren arloan hornikuntza-kate digitalean, erauzketa-prozesuetan parte hartzen dutenean, AA elikatzen dutenean eta hondakin elektronikoak kudeatzen dituztenean.

Mundu zabaleko politiketan eta araudietan, gero eta neurri berri gehiago ezartzen dira, honako hauxe estaltzeko asmoz: segurtasun robotikoa, gizakien zein roboten arteko elkarreragina, deskonexiorako eskubidea, lanaren kudeaketa algoritmikoaren hobekuntza, telelana eta plataforma seguruetako lana.

interempresas.net