1. AA sortzailea eta AA espezializatua ulertzea

AA bi kategoria nagusitan dago banatuta: AA sortzailea eta AA espezializatua. AA sortzaileak, GPT-4k, esaterako, eduki berri eta originala sortzen du lehendik dauden datuak kontuan hartuta. AA espezializatuak, ordea, berariazko zereginak ditu helburu; esate baterako, datuen analisian ereduak iragartzea. Zuzendaritza-taldekoek alde horiek ulertu behar dituzte, haien enpresaren premien arabera teknologia egokia ezarri ahal izateko.

2. AAko erantzunetako segurtasuna eta kalitatea

AA ezartzen denean, segurtasunaren eta kalitatearen arloko arriskuak sortzen dira erantzunetan. Funtsezkoa da zuzendaritza-taldekoek arrisku horiek antzematea eta kudeatzea, AAn oinarritutako erabakiak seguruak eta zehatzak direla bermatzeko. Horretarako, nahitaezkoa da behar besteko neurri zuzentzaileak eta segurtasunerako protokolo sendoak ezartzea.

3. AAren bidez negozio-prozesuak hobetzea

AAk badauka negozio-prozesuak eraldatzerik, eraginkortasuna handitu eta kostuak murrizten dituelako. Zuzendaritza-taldekoek euren eragiketetan ezartzeko moduko erabilera-kasuak antzeman behar dituzte. Hona hemen erabilera horien zenbait adibide: errepikatzen diren zereginen automatizazioa, bezeroentzako arretaren hobekuntza eta hornikuntza-katearen optimizazioa. Izan ere, AA behar bezala ezarriz gero, eragin adierazgarria izan dezake enpresen emankortasunean nahiz errentagarritasunean.

4. Informatika Sailaren zeregina AA ezartzeko orduan

CIOren lidergopeko Informatika Saila sustatzaile nagusia izan behar da AA ezartzeko orduan. Erabakigarria da CIO eta bere taldea behar bezala prestatuta egotea AAko proiektuak proposatzeko eta betearazteko.

Informatika Sailaren lankidetza aktiboa bada, enpresaren helburu estrategikoekin bat datorren integrazio eraginkorra ziurtatzen da.

5. Lehiakortasuna eta AAren ezarpena sektorean

Enpresak adi-adi egon behar dira, haien lehiakideak AA erabiltzen egon daitezkeelako abantaila lehiakorra irabazteko asmoz. Funtsezkoa da zuzendaritza-taldekoek etengabe ebaluatzea AA nola erabili dezaketen euren eragiketetan bertan, atzean ez geratzeko. Sektoreko joeren berri izatea eta berrikuntza teknologikoetara azkar-azkar egokitzea funtsezkoa da merkatuko posizioari eusteko eta hobera egiteko orduan.

emprendedores.es