“Ispilu, ispilutxo, esaidazu zein den erresuma honetako emakume ederrena” zioen Edurne Zuriren amaordeak aurrez aurre zuen beira hiztunari begiratzen zionean. Edertasun enpresek errealitate bihurtu nahi dute fantasia baten ikur hura. Eta asmo hori lortzekotan dira hainbat teknologia baliatuz: hasi sentsoreetatik eta adimen artifizialera, tartean igaroz ahots bidezko kontrol sistemetatik, errealitate handitutik, aurpegien errekonozimendutik edo 3D eskanerretik.

Horiek denak erabili dituzte ispilu adimendunak, kosmetika, kartara eginiko lurrinak eta bestelako aparatuak sortzeko eta, horrela, etxeko komuna edertasun saloi bihurtzeko. CB Insights plataformak edertasun industriako joerei buruz egin duen txosten baten arabera, enpresa sortu berriek gero eta merkatu-kuota handiagoa dute amaierako kontsumitzaileari zuzendutako marka eta produktu berriei esker, eta sektoreko konpainia handiengana hurbiltzen ari dira. Horri erantzuteko, enpresa handiek hainbat metodo baliatu dituzte: beste enpresa batzuekin bat egitea edo beste enpresa batzuk erostea, inkubazio eta azelerazio programak, teknologia berriak dendetan, eta abar.

L’Oréal da eraldaketa horren eredu argienetako bat. Talde horrek duela urtebete jakinarazi zuen bere ikuspegi aldaketa: alde batera utzi zuen munduko lehen edertasun konpainia izateko helburua, edertasun teknologietako munduko lehen konpainia izateko. “Digitalizazioarekin taldearen balio kate osoa birformulatzen ari gara. Horixe transmititzen dute gure berrikuntzek” dio Lubomira Rochet, L’Oréal enpresako arlo digitaleko zuzendari globalak.

Rochet-ek hizpide hartu ditu azken bost urteetan taldearen aldaketak gidatu dituzten ildo garrantzitsuenak. Lehena: merkataritza elektronikoa emendatzea, konpainiaren diru-sarreren % 23 eta hazkundearen ia % 15 ordezkatzen duelarik. Bigarrena: datuak analizatzea produktu, kolore eta testura berriak sortzeko. Adibidez, DeepVision sistema gai da Instagram sare sozialean partekatutako milaka irudi bistaratzeko. Gero, irudi horiek iragazi egin daitezke irizpide desberdinak kontuan hartuta (esaterako, elkarreraginak, “Atsegin dut” kopuruak, aipamenak, datak edo joerak), eta horrela jakin daiteke zer bilatzen duen jendeak, bilakaera horren araberako produktuak garatzeko. “Inspirazio iturritzat erabil dezakegu kontsumitzaileek sare sozialean partekatzen eta bilatzen dutena” esan du.

elpais.com