Ia hamar kanadarretik batek baliatu zuen partikularren arteko ostatu edo garraio zerbitzuren bat (AirBnb, Uber edo antzekoak), aste honetan argitaratu den azterlan baten arabera, zeinak 2015eko azarotik 2016ko urrira bitarteko denbora-tartea baitu aztergai.

Azterlanak dioenez, denbora horretan, 2,7 milioi lagunek erabili zituzten partikularren arteko horrelako zerbitzuak, plataforma digitalen bitartez lortuak.
18 eta 34 urte bitarteko pertsonak dira gidaridun auto zerbitzuak (Uber edo Lyft) gehien erabiltzen dituztenak, eta gizonen eta emakumeen arteko proportzioa baliokidea da. Horrelako zerbitzuengatiko fakturazioa 241 milioi dolar kanadarrekoa izan zen denbora tarte horretan.

Partikularren arteko garraio zerbitzuak baliatzen dituzten kanadarrek batez beste 122 dolar gastatu zituzten denbora horretan. Aitzitik, ostatu pribatuko gastuak handiagoak izan ziren, 1.000 milioi dolar kanadarretik gorakoak, eta kopuru horren %63 herrialdetik kanpoko egonaldietarako izan zen.
IPSOSek eginiko inkesta berean ikus liteke kanadarren %27aren iritziz zerbitzu horiek ez direla fidatzekoak, eta %36ak uste du ez direla seguruak. %49ak ez zituen ezagutzen ekonomia kolaboratiboak eskaintzen dituen zerbitzu horiek.

Gazteen artean bakarrik hobetzen da pertzepzioa: datozen hilabeteetan ekonomia kolaboratiboko zerbitzuren bat erabiltzeko prest dauden kanadarren %55en artetik, %51k 18 eta 34 urte bitartean dituzte, eta datu hori bat dator estatistika ofizialean islatzen denarekin.

Gainera, gazte horiek diote gehiago fidatzen direla ekonomia kolaboratiboaz garraio edo ostatu zerbitzu tradizionalez baino.

tendencias21.net