Elikagaiek eragindako gaixotasunak osasun publikoko arazo handia dira mundu osoan. Osasunaren Mundu Erakundearen estatistiken arabera, 600 milioi lagun inguru (hamarretik bat) gaixotzen dira eta 420.000 hiltzen dira urtero kutsatutako elikagaiak jateagatik. Europako funtsekin finantzatutako FRESHDETECT proiektuaren bidez gailu eramangarri bat garatzen ari dira, zeina gai izango baita okelaren kalitate mikrobiologikoa neurtzeko. Horri esker, gaixotze- eta hilkortasun-tasak murriztea espero da.

Proiektuaren web orrian dagoeneko argitaratu dute produktuaren berri emateko foiletoa eta bertan azaltzen da gailu eramangarri honek “okelaren kontaketa bideragarri totala (TVC) egiten duela laginak egin eta inkubatu beharrik gabe”. Fluoreszentzia bidezko espektroskopia prozesu bat erabiltzen du, argi urdin bizi bat proiektatuz okelaren gainazalean, eta horrela neurtzen ditu fluoreszentzia-firma desberdinak eta bakterio-flora. “TVC kalkulatzean analisi-algoritmo fidagarri bat erabiltzen da produktuaren kalitate mikrobiologikoa zehazteko. Neurketak ez dira inbaditzaileak eta segundo gutxi batzuk baino ez dira behar. Emaitzak zuzenean agertzen dira gailuan neurketa egin eta gero”.

Gailu berri hau gai da 2.000 neurketa gordetzeko. Emaitzak ordenagailu batean gorde daitezke USB ataka bat erabiliz. Produktuaren foiletoak berak dioen bezala: “Balizko aplikazio-esparru ugari ditu, besteak beste, proba azkarrak egitea prozesamendu kate bateko barne-kontrolerako prozesuetan eta okela kudeatu eta zaintzea kalitatean kalterik eragin gabe zamalanak egiten diren guneetan.

cordis.europa.eu