Hona hemen, besteak beste, elikagaigintzan egingo diren berrikuntza teknologikoak:

Elikagaien 3Dko inprimaketa, esaterako, kontzeptu berritzailetik haratago bilakatu da, elikagaien pertsonalizaziorako bideragarria den tresna bihurtzeko. Teknologia horri esker, berariazko premia dietetikoetara eta norberaren gustuetara egokitutako elikagaiak sortzen dira. Horrez gain, forma eta testura paregabeak dituzten elikagaiak inprimatzeko gaitasunak aukera berriak irekitzen ditu gastronomian. Era berean, garrantzitsua ere bada elikagaien zarrastelkeriaren murrizketan daukan ekarpena, osagaiei modu eraginkorragoan ateratzen zaielako onura eta hondakinak gutxitzen direlako.

Bestetik, elikadurako Gauzen Internet (IoT) goitik behera aldatzen ari da elikagaigintza, gailuen eta sistemen arteko lotunearen bidez. Teknologia horri esker,datuak unean bertan bildu eta trukatzen direnez, eragiketen eraginkortasuna eta elikagaien segurtasuna hobetzen dira. Hotz-katearen monitorizazioa adibide nabaria da, eta, bertan, IoT sentsoreek bermatu egiten dute elikagaiak baldintza egokietan egongo direla garraiatu eta biltegiratu bitartean. Horrez gain, etiketa adimendunek informazio baliotsua eskaintzen dute elikagaien freskotasunari eta kalitateari buruz, eta, horrela, kontsumitzaileen erosketa-esperientziak egiten du hobera.

Errealitate areagotua (EA) eta errealitate birtuala (EB) elikagaiekin eta elikagaien markekin daukagun elkarreragina aldatzen ari dira. Teknologia horiei esker, esperientzia murgiltzaileak eta pertsonalizatuak egiten dira, kontsumitzaileen partaidetza hobetzeko. Esate baterako, EAko aplikazioek elikagaien itxura nolakoa izango litzatekeen erakutsi dezakete kontsumitzaileen etxean bertan, erosi baino lehen. Horrez gain, EAk eta EBk aukera apartak eskaintzen dituzte elikagaien arloko hezkuntzarako, esperientzia elkarreragileak eskaintzen dituztelako nutrizioari eta elikagaiak prestatzeko metodoei buruz.

Era berean, robotikak funtsezko zeresana dauka elikagaigintzan, baina, batez ere, errepikatzen diren zereginen automatizazioan eta ekoizpenaren eraginkortasunaren hobekuntzan.Robotak zeregin zehatzetarako erabiltzen dira; esate baterako, elikagaiak ebakitzea, zuritzea, sailkatzea eta paketatzea. Horrez gain, modu nabarian sustatzen dute elikagaien segurtasuna, sentsoreak eta kamerak dituztelako kutsatzaileak antzemateko eta desagerrarazteko. Are gehiago, nekazaritzan, robotek ereiten eta uzta biltzen laguntzen dutenez, eraginkortasuna hobetzen dute, eta laneskuaren premia murrizten dute.

foodretail.es