Gaur egun, industria sektorean hitzetik hortzera darabilgu 4.0 industria delakoa. Horrela deitu ohi zaio dagoeneko gure artean dugun laugarren iraultza industrialaren osteko industriari. 4.0 industria da smart factories edo fabrika adimendunak sortzea, simulazioa bezalako teknologia berriak integratuz. Fabrika adimendunen abantaila nagusia da hobeto egokitzen direla produkzio prozesuen premietara eta askoz eraginkorragoak direla baliabideak kudeatzean.

Gartner aholkularitzak duela gutxi argitaratutako inkesta baten arabera, Gauzen Internetaren (IoT) abantailez jabetu diren enpresen % 48 dagoeneko ari dira erabiltzen biki digitalak edo aurreikusi dute urtearen amaieran egingo dutela. Eta urtean 5.000 milioi dolarretik gorako diru-sarrerak dituzten manufakturako enpresen gutxienez % 50ek biki digitalekin lotutako ekimenen bat hasiko dute 2020an.

Horrek esan nahi du industria arloan lan egiten duen eta etorkizunean biziraun nahi duen edozein konpainiak bigarren lantegi bat sortu beharko duela daukan lantegi bakoitzeko. Alabaina, bigarren fabrika hori ez da fisikoa izango, baizik digitala. Baina, zer da biki digital bat? Laneko produktu erreal baten eredu birtual simulatu bat da, produktu fisikoan muntatuta dauden eta mundu errealeko datu operatiboak denbora errealean biltzen eta bidaltzen dituzten sentsoreek emandako informazioan oinarritua dagoena. Biki digitala lan-baldintza errealetan ikertzean, enpresek posible izango dute produktua aztertzea martxan dagoen bitartean, bere ingurune operatibo errealean eta denboran zehar.

elpais.com