Trantsizio Energetikoari buruzko azken konferentzian, hizlari guztiek bektore berbera proposatu zuten CO₂ isuri gero eta handiagoak murrizteko, alegia, hidrogenoa (H₂). Adituen arabera, gas horrek erregai kutsagarri guztiak ordezkatuko ditu hamar urteko epean.

Etorkizun ez oso urrun batean, erregai pila bat egongo da gaur egun gasa, gasolioa edo beste edozein erregai kutsagarri erretzen duten galdarak dauzkagun lekuetan, eta erregai hori gai izango da argindarra sortzeko hidroduktu komertzialetatik iritsiko den hidrogenoarekin. Nahikoa izango da kaletik hartutako oxigenoa injektatzea eraikin oso batek behar duen argindar guztia sortzeko, erregai tradizionalak erretzean lortzen den errendimenduaren ia hirukoitzarekin eta gas kutsagarririk isuri gabe. Gainera, erregai pila horrek ur-lurruna sortzen du hondakin gisa; lurrun hori berogailuetan erabili ahal izango da neguan, eta baita ere udan beroa hotz bihurtzeko eta aire girotua izateko, xurgatze-makina baten bidez.

Honda auto fabrikatzaile japoniarrak Home Energy Station garatu du, eguzki energiatik hidrogenoa lortzeko balio duen etxerako sistema autonomo bat. Gero, hidrogeno hori erabili ahal izango da erregai pilekin dabiltzan ibilgailuak kargatzeko, eta etxerako argindarra eta ur beroa lortzeko.

Japoniak bezala, Europako gobernuak ere hasi dira hidrogenoaren inguruko ikerketa eta garapen programak sortzen, eta teknologia horiek merkaturatzen hasteko fasean daude jada.

Alemaniak dagoeneko abiarazi du hidrogeno pilekin dabilen munduko lehenengo trena, konbustioak eragindako isuri kutsagarri guztiak desagerrarazten dituena. Alemaniak, energia berriztagarrien erabileran eta erregai fosilak baztertzeko prozesuan lider bihurtu denak, bat egin du Japoniarekin, apustu irmoa eginaz hidrogenoan oinarritutako etorkizun energetiko baten alde. Honda, DaimlerChrysler, Ford, General Motors/Opel, Hyundai, Kia, Renault/Nissan, Toyota eta beste hainbat konpainia hidrogenozko ibilgailuekin lotutako proiektuak garatzen ari dira.

theconversation.com