Gizakion kontsumorako ekoizten den janariaren heren batek zakarretan amaitzen du, Nazio Batuen Elikadura eta Nekazaritza Erakundearen arabera (FAO, ingelesezko siglak). Horrek esan nahi du guztira 1.300 milioi tona elikagai xahutzen direla urtero eta, bien bitartean, munduan ia 2.000 milioi pertsona daudela goseak edo desnutrizioak jota. Suediako jatetxeen sektoreko hiru pertsona ezagunek bat egin dute proiektu batean errealitate horri aurre egiteko. Horrela sortu da K-märkt, 1.000 lagun ingururentzako gaitasuna duen buffet-jatetxe bat, non bezeroek pisura ordaintzen duten kontsumitu dutena eta errezeta desberdinak dastatzen dituzten egunero.

Ez chefek ez jankideek ez dakite zer zerbitzatuko den biharamunean. “Menurik ez izateak esan nahi du gaueko azken orduan erosi dezakegula janaria. Hornitzaileei deitzean ez diegu esaten zer behar dugun; galdetzen diegu zer duten soberan” kontatu du Jens Dolk ardo adituak. Hala, goi-mailako kalitateko elikagaiak lortzen dituzte prezio merkeagoan eta ez dute hainbeste janari xahutzen, beste bezeroek nahi ez dutena edo galtzeko zorian dagoena erosten dutelako.

Goizaldean iristen dira hornitzaileen janari-kamioiak, bost eta erdiak aldean. Beste jatetxe batzuetan janaria galtzeko arriskua dute, baina guri ez zaigu halakorik gertatzen, iritsi eta ordu pare batera lapikoan eta zerbitzatuta dagoelako”. “Gerta liteke jatetxe batek tomateak behar izatea eskatu eta handik egun batzuetara zerbitzatzeko. Hornitzaileak ez dizkio bidaliko gaur bakarrik jan daitezkeen tomateak, hots, egun bat igarota galduko direnak, baina guri bai, egunean bertan eskainiko ditugulako” adierazi du Dolk-ek EL PAÍS egunkariak Stockholmen egin dion elkarrizketa batean (Suediako Institutuak eta Suediak Madrilen duen Enbaxadak gonbidatuta).

elpais.com