Industria logistikoak entrega-epeak murrizteko eginiko ahalegin asko ibilbideak optimizatzera bideratuta daude, baina gidariek ez dute hor ematen denbora gehien. Dirudienez, gidariek azken 100 metroetan igarotzen dute beren lan jardunaldiaren %75, eta ez “azken milian” (edo azken kilometroan). Zergatik? Batzuetan bezeroak paketea jaso zain egon behar dutelako, bestetan aparkaleku bila dabiltzalako, edo bezeroekin hizketan gelditu direlako. Halaxe dio Wise Systems enpresako zuzendari exekutibo Chazz Sims-ek. AEBetako startup horrek software autonomo bat garatu du ibilbide eta banaketetarako.

Duela gutxi, MIT Technology Review aldizkariak antolatutako EmTech Digital konferentzian emandako hitzaldi batean, Sims-ek datuen eta adimen artifizialaren (AA) bidez lortutako hainbat informazio eman zituen: horrelako zerbitzuak asko aldatzen dira eguneko orduaren, bezeroaren, produktu motaren eta entrega egiten duen pertsonaren arabera. Adibidez, zenbait dendak lan-fluxu handiagoa dute eguneko zenbait unetan (bezero gehiago edo hainbat banaketa-kamioren produktuak jasotzen dituzte ordu horietan). Patroi horiek detektatu ondoren, enpresak entrega-ordutegiak aldatu zituen eta horrela lortu zuen denbora eta kostuak murriztea.

Wise Systems enpresaren sistemek automatikoki antolatzen dituzte ibilbideak, gidariak eta ordutegiak, horretarako kontuan hartuz beste baldintza gehigarri batzuk: klima, trafikoa eta karga-deskargarako tokiak. Anheuser-Busch garagardo konpainiako (startup-aren bezero garrantzitsuenetako bat) flotaren datuak aztertu ondoren, Wise Systems-ek %85 gutxitu zituen entrega-atzerapenak eta %13 txikitu zituen flotak egindako distantziak.

technologyreview.es