Eredu matematikoak, estatistikoak eta adimen artifizialeko algoritmoak baliatzen dituzte pandemiak Euskadin izan duen inpaktua deskribatzeko, gaitzaren infekzio prozesua eta denboran zehar izandako bilakaera irudikatuz.

Halaber, aldian behingo txostenak egiten dituzte zazpi egunerako aurreikuspenekin, oinarritzat hartuz egunero jasotzen diren datuak: kasu positiboak eta ospitaleratzeak Euskal Autonomi Erkidegoan (EAE) eta Erakunde Sanitario Integratu (ESI) garrantzitsuenetan.

Osasun arloko krisi hau hasi zenetik, BCAMek administrazioaren zerbitzura jarri ditu bere esperientzia eta ezagutza, horrela informazioa emateko eta aurreikusitako ospitaleratze-kopuruari buruzko eguneroko balioespenak egiteko, horien artean larrien izango direnak eta ZIUetako arreta beharko dutenak.

Hain zuzen, zentroak lantalde bat jarri du martxan Datuen Zientzia eta Adimen Artifizialeko ikerketa eremuan eta Biologia arloko Matematikaren Modelizazio eremuan, COVID-19-a aztertzeko. Lantalde hori estuki ari da elkarlanean UPV/EHU, Ikerbasque eta Euskadiko osasun erakundeekin. Diziplina anitzeko talde bat da, Euskadin eta Italian lanean ari dena eta nazioartean erreferentziazkoak diren zientzialariz osatua dagoena. Esperientzia zabala dute gaixotasun infekziosoen modelatzean (adibidez dengea, ebola edo gripea) eta eremu bereko beste erakunde batzuetako adituekin kolaboratzen dute. Horri esker, elkarren osagarri diren ikuspegi zientifiko desberdinetatik lantzen dute arazoa, administrazioei informazioa emanaz erabakiak hartzeko, eta ospitaleei laguntza emanaz beren egunerokoan, osasun arloko krisi hau kudeatzeko.

Eredu epidemiologikoei (SIR eta luzapenak), ikerketa operatiboari eta Gauss prozesuei esker, gaixotasunaren dinamika deskribatzea lortu dute. EAEko COVID-19 kasu baieztatuen intzidentziari, ospitaleratzeei eta ZIUn dauden pazienteei eta hilkortasunari buruzko datuak (Osakidetzak emandakoak) erabili dituzte emaitzak baliozkotzeko. Emaitza horiek diote epidemia fase linealean dagoela orain Euskadin, eta kasu positiboen kopurua egonkortzen ari dela. Aldian behingo txostenak egin dituzte zazpi egunerako aurreikuspenekin, oinarritzat hartuz egunero jasotzen diren datuak: kasu positiboak eta ospitaleratzeak EAEn eta ESI garrantzitsuenetan. Gainera, lanean jarraitzen dute euste-neurriek gaitzaren transmisioan izan dituzten ondorioak ebaluatzeko, eta horrela etorkizunean laguntza emateko neurri horien pixkanakako malgutze-prozesuari buruzko erabakiak hartzean.

wp.bcamath.org