Adimen artifizialak etorkizun handia izan dezake sektore gehienetako -edo guztietako- enpresetako prozesuei aplikatuta. Baina zenbakiei erreparatuz gero, oso presentzia txikia du oraindik sektore askotan.

Horietako bat da osasun sektorea, MarketsandMarkets aholkularitzak argitaratu berri duen azterlaneko datuen arabera. Aholkularitza horrek kalkulatu duenez, 2020an adimen artifizialak 4.900 milioi dolar bakarrik mugituko ditu sektore horretan, baina zifra hori 45.000 milioi dolarreraino igoko da 2026an. Hau da, datozen sei urteetako batez besteko urteko hazkundea % 44,9koa izango da.

Hainbat arrazoi daude bilakaera horren atzean. Batetik, datu bolumen handiak kudeatu beharko dira, eta beharrezkoa izango da osasun kostuak murriztu edo zerbitzuak hobetzea (osasun arloko enpresak aspaldi dabiltza erronka horiek gainditu nahian); eta bestetik, Covid-19arekin lotutako arrazoiak daude, izan ere, teknologia beharko da etorriko diren agerraldi berriak geldiarazteko, eta farmazia eta bioteknologia konpainiek ere teknologia erabiliko dute koronabirusaren aurkako txerto edo tratamenduak garatzeko prozesuak azkartzeko.

Azterlan horren arabera, softwarearen segmentua izango da datozen sei urteetan gehien haziko dena. Konpainia asko ari dira adimen artifizialaz funtzionatzen duten software konponbideak garatzen, sostengu operatiboa emateko ospitaleei eta beste osasun zentro batzuei edo arreta medikoko hornitzaileei.

ituser.es