Internetek zeure amak baino hobeto ezagutzen zaitu. Aztarna mordoa uzten dugu mundu digitalean: web orri batera sartzeko cookie politika onartzen dugun bakoitzean, sare sozialetan bideo bat partekatzen dugunean, albiste bati like ematen diogunean edo YouTube-n bideo bat ikusten dugunean, Amazon-en produkturen bat bilatzen dugunean edo Google Maps erabiltzen dugunean? Eta mundu osoko milaka enpresa prest daude datu horien truke ordaintzeko? eta ondo ordaintzeko gainera!

Horixe da Big Data teknologiaren lana: informazio hori guztia biltegiratzea, aztertzea eta kudeatzea, hortik irabazi ekonomikoa ateratzeko. Big Data da enpresek guri buruz dakitena, nahiz eta ez dugun haietako gehienekin harremanik izan bizitza osoan.

Informazio hori gure eguneroko jardueren bidez eskuratzen da (app batera sartzean, autoko GPSa piztean, hegazkin bat erreserbatzean edo kreditu txartelarekin ordaintzean), eta ez dakigu nola ezabatu. Datu horiek gure nortasunaren profil oso zehatza osatzen dute, eta horixe erabiltzen da mota guztietako eskaintzak egiteko. Eskaintza horiek guretzat pentsatuta daude, guretzat interesgarri egin eta ukaezin bihurtzeko.

IBM multinazional teknologikoak dauzkan datuen arabera, mundu osoko internautek beren bizitzei buruzko 2.500 milioi GB informazio uzten dute egunero. Eta datu kopuru izugarri handi hori munduko milaka enpresak biltzen dute irabaziak lortzeko. Mega guzti-guztiak aztertzen dira lastoa baztertu eta ale baliotsua eskuratzeko. Nahi duten informazioa lortzen dute ? eta, jakina, nahi ez dutena ere bai.

elmundo.es