Euromonitor International merkatuen ikerketako aholkularitzak azterlan batean identifikatu ditu produktu bat garatzean egiten diren berrikuntza arloko 5 akats garrantzitsuenak. Konpainiaren arabera, enpresek akats-patroi hori jarraitzen dute berritzen saiatzen direnean eta denek dute sendabide bera: merkatuen ikerketa hobetzea.

Euromonitor aholkularitzak dioenez, aurrerapen teknologiko geldiezinak eta ideien iraungitze azkarrak gehiegizko presioa eragiten dute berritzaileengan, eta hori eragozpen bat da negozioen hazkunderako. Presio hori hazkundea eragozten duten bost oztopo hauetan islatzen da:

Behar bezainbat ez inbertitzea aldez aurretik

Euromonitor International aholkularitzak argitaratutako txostenaren arabera, enpresek ikerketa-protokolo zorrotzak aplikatzen dituzte kontzeptu-testetan eta produktu berriak merkaturatzean. Halere, ez dute askorik ikertzen ideiak sortzeko fasean. Badirudi ideiak berez sortzen direla, eta orduan hasten direla inbertitzen. Baina hori ez da horrela. Logikoa da ideia on batek sor lezakeen balioarekiko proportzionala den ordaina jasotzea.

“Etxetik hurbil” geratzea

Txostenaren arabera, enpresak beren sektorean edo produktu-kategorian zentratzen dira, baina berrikuntza harrigarrienak ez dira hortik sortzen, baizik eta enpresaren eguneroko errealitatetik haragoko informazioa bilatzen duten merkatu ikerketetatik. Zergatik ezin dut harago begiratu nire produktua garatzean?

Kontzeptualegi izatea

Askotan ez ditugu kontuan hartzen gure konpainian epe ertainean eragina izan dezaketen joerak. Akats hori saihesteko garrantzizkoa da ikerketa arloko profesionalak izatea, joerak ezagutzen dituztenak eta badakitenak nolako eragina izan dezaketen enpresan edo produktu zehatz batean.

Konponbidean zentratzea eta ez arazoan

Ohikoa izaten da enpresek produktu berri bat merkaturatu nahi izatea gabezia bat identifikatzen dutenean, gabezia horren ezaugarriak behar bezain sakon aztertu beharrean.

Merkaturatze-datan zentratzea

Enpresa batzuentzat garrantzitsuagoa da merkatura lehenengo iristea onenak izatea baino. Akats hori saihesteko, aholkularitzak gomendio bat egiten du: ziurtatu produktuaren garapena erabat zentratzen dela kontsumitzailearengan eta harentzat sor ditzakeen abantailetan.

foodretail.com