Badirudi enplegatzaileen belarrietara iritsi dela gaitasun ertain eta baxuetan espezializatutako langileak arriskuan daudela automatizazioaren mehatxuagatik. Orain, antza denez lerrokatzen ari dira produkzio-katearen bi alderdiak, eta etengabeko prestakuntzaren eta birkualifikazioaren aldeko apustua egin da. Enplegatzaileek beren langileak mantendu nahi dituzte eta talentu gabeziari aurre egin. Bestalde, langileek beren gaitasunak eguneratu nahi dituzte eta robotek bereganatu ezin dituzten gaitasunak barneratu.

AT&T enpresak ia 1.000 milioi euro inbertitu ditu Future Ready izeneko prestakuntza-proiektu batean, enpresaren ikerketa batek frogatu ondoren langileen erdiak baino ez zeuzkala enpresak behar zituen gaitasun teknikoak. Urteko 176 milioi bideratu zituzten onlineko ikastaroetara, prestakuntzara eta gaitasunak hobetzeko barne-plataforma bat sortzera. Plataforma horrek identifikatzen du enpresa barruko zein postu ugaritzen edo gutxitzen diren, langileei laguntzen die ulertzen zein gaitasun behar dituzten lanpostu hau edo hura eskuratzeko eta enpresa barruko LinkedIn moduko bat da.

Langileek ez zuten eskatu prestakuntza hori, baina beharrezkoa zuten beren lana ongi egiten jarraitzeko, dio Jennifer Fitzmaurice, AT&T enpresako prestakuntza arloko presidenteordeak. Oraingoz, urtean 18 milioi prestakuntza-ordu inguru finantzatu dira diru horrekin.

technologyreview.es