Koronabirusak ezinbestean behartu gaitu arreta gehiago jartzera diseinuko berrikuntzetan eta etorkizunean beharko diren eraikuntza-kodeetan, eraikinek kutsadurak kontrolatzeko neurriak bete ditzaten. Gaixotasun kutsakorretako espezialistek gehiago parte hartu beharko dute eraikuntza-proiektuetan, zeren orain arte ulertu izan baita diseinu-fasea kostuak murrizteko aukera bat baino ez zela.

Komun publikoentzat iradokitako berrikuntzen artean daude beren kabuz garbitzen diren gelak, gizakiok ukitu gabe irekitzen/ixten diren irteerak, langile laguntzaileak eta sentsoredun iturri gehiago. Ideia horien defendatzaileek diote kutsatuta egon daitezkeen azalera gutxiago ukituz gero, higiene hobea izango dugula, eta publikoak konfiantza gehiago izango duela instalazio publikoen garbiketan.

Australiako Unibertsitate Nazionaleko Gaixotasun Kutsakor eta Mikrobiologiako irakasle Peter Collignon-en arabera, komun publikoak kontuan hartu beharreko arazo bat dira iturri eta ateetako azalerengatik, batik bat, gorotzen bidez ere birusak zabaltzen direlako. “Koronabirusa arnas aparatutik irteten diren zipriztinen bitartez transmititzen da nagusiki, beraz, erraza da zure eskuek ukitzen dituzten azaleren bidez kutsatzea… Baina badaude beste modu batzuk, eta birusa gorotzetan ere egon liteke. Pazienteen % 60 ingurutan ikusi da hori” azaldu du. “Itxialdiko neurriak leuntzen ari diren honetan, komun publikoak beharrezkoak izango dira, eta egokienak izango dira ezer ukitu gabe funtzionatzen dutenak. Sentsoreekin aktibatzen diren iturriak behar ditugu”.

eldiario.es