Itsu-itsuan sinesten baditugu teknologo baikorrenen aurreikuspenak, 10 urte barru toki guztietan egongo dira auto autonomoak, dronek entregatuko dizkigute paketeak eta robotek ekarriko dizkigute erosketak. Eta laster, gure hiriek errealitate areagotuko (EA) geruza bat izango dute.

Egia izan ala ez, eszenatoki horretan badago etorkizunerako funtsezkoa izango den pieza bat: kokapen-teknologia ultra zehatza. GPSa eta nabigazio-mapetan agertzen den puntu urdina baliagarriak dira ezagutzen ez dugun hiri batean mugitzeko, baina ez dira nahikoa zehatzak makina adimendunentzat, jakin behar baitute non dagoen elementu bakoitza zentimetrotako eskala batean.

Egoitza Londresen duen Scape startup-ak (Erresuma Batua) eskainiko digu aurrerapen hori. Enpresaren fundatzailekide Edward Miller-ek azaldu duenez, eskaintzen duten ikusizko posizionamendu-zerbitzuak GPSa eta kameren irudiak erabiltzen ditu, bizpahiru segundotan kalkulatzeko zehazki non gauden. Enpresak kaleetako 2.000 milioitik gora irudi bildu ditu munduko 100 hiri baino gehiagotako 3D mapak sortzeko, besteak beste, Londres, San Frantzisko (AEBak), Paris (Frantzia), Mosku (Errusia) eta Tokiokoak (Japonia). Datu horietako batzuk langileek bildu zituzten, hiriak zeharkatuz kamerekin hornitutako bizikletetan, baina Scape plataformak edozein iturritako irudiak prozesatu ditzake.

Scape sistemaren algoritmoek edozein iruditako “puntu interesgarriak” (kartelak, erakusleihoak edo farolak) erauzten dituzte eta datu basean dauzkaten milaka milioi erreferentziekin alderatu. Ondoren, sistemak triangulazioa erabiltzen du jakiteko objektu hori zein angelu eta distantziatatik bistaratu den eta kokaleku zehatza bidaltzen dio amaierako erabiltzaileari. Zehaztasun horri esker Errealitate Areagotua GPSa edo beste teknologia batzuk baino hobeto finkatuko da errealitatean, eta teknologia askoz harrigarriagoa eta erabilgarriagoa izango da. "Scape sistemak hurrengo mailara igo nahi du. Bere asmoa da gaitasun hori zabaltzea mugitzen den edozein hiri bizitara” azaldu du Millerrek.

technologyreview.es